Ҳурматли истеъмолчилар!
Жорий йилнинг 4 январь куни истеъмолчиларни ёқилғи-энергетика ресурслари билан таъминлаш бўйича амалга оширилган ишлар юзасидан маълумот бериб ўтамиз.
Хусусан, кеча, 4 январь куни иссиқлик электр станциялари ва гидро электр станциялари орқали 227 миллион 100 минг киловатт соат электр энергияси ишлаб чиқарилди. Шундан республика истеъмолчиларига 218 миллион 200 минг киловатт соат электр энергияси етказиб берилди.
Шунингек, 4 январь куни ҳудудий газ таъминоти корхоналари томонидан истеъмолчиларга жами 102 миллион 510 минг метр куб табиий газ етказиб бериш режалаштирилган ҳолда амалда 111 миллион 201 минг метр куб табиий газ етказиб берилди. Шунингдек, республика истеъмолчиларига жами 1 минг 687 тонна суюлтирилган газ етказиб берилди.
Истеъмолчиларни кўмир ва брикет маҳсулотлари билан таъминлаш мақсадида 4 январь куни “Ўзбеккўмир” акциядорлик жамияти томонидан 10 минг 419 тонна кўмир маҳсулотлари етказиб берилди.
Навбатчилик давомида электр энергияси таъминоти бўйича ҳудудлардан қилинган мурожаатлар масъул мутахассисларга етказилди. Шунингдек, кеча, 4 январь куни 6:59 да ва 10:10 да “Муборак нефть ва газ қазиб чиқариш бошқармаси”га қарашли нефть ва газ қазиб чиқариш конларини электр энергияси билан таъминлаб турган “Нефтчи” подстанциясидан чиқувчи Л-Зеварда -1,2 электр узатиш тармоқлари реле ҳимоясидан ўчган. Соат 12:15 да носозликлар бартараф этилиб истеъмолчиларга тўлиқ кучланиш берилган.
Ҳозирда “Муборак нефть ва газ қазиб чиқариш бошқармаси”нинг нефть ва газ конларида носозлик сабаб тўхтатилган барча 14 та газ ҳайдаш агрегатлари ишга туширилди ва иш режимида ишламоқда.
Юзага келган носозликларни бартараф этиш натижасида Муборак ГҚИЗда газ таъминоти тўлиқ тикланди. Бироқ, 4 январь куни етказиб берилмаган ҳажмлар тўлдирилмади, бу эса зарур газ босимини тиклашга тўсқинлик қилади.
Шунингдек, 4 ва 5 январь кунлари ҳаво ҳароратининг пасайиши туфайли газ истеъмолида ўсиш кузатилмоқда. Шу муносабат билан, республика аҳоли истеъмолчилари ва электр энергиясини ишлаб чиқарувчи “Иссиқлик электр станциялари” АЖ корхоналарини табиий газ билан барқарор таъминлаш биринчи даражали вазифадир.
Шунинг учун, бир қатор зарур вақтинчалик чоралар жорий этилмоқда. Улардан бири – автомобилларга газ тўлдириш компрессор шохобчалари (АГТКШ)нинг соат 15:00 дан 05:00 гача ишлашини чеклашдир. Ушбу вақтинчалик чора магистрал газ қувурларида барқарор газ босими таъминланиши йўлга қўйилгунга қадар жорий этилади.
Шунингдек, бугун, 5 январь куни Марказий Осиё ва Қозоғистонни боғловчи ягона энергетик тизимининг электр узатиш тармоқларида режадан ташқари содир бўлган узилишлар сабабли аварияга қарши автоматика ишлаган.
Энергетик қурилмаларга шикаст етмаслик учун ускунанинг технологик ҳимояси автоматик равишда ишлаган ва айрим электр станциялардаги энергоблоклар ўчирилди. Хусусан:
Тўрақўрғон ИЭСда қуввати 750 мегаваттдан 500 мегаваттгача;
Тахиатош ИЭСда 280 мегаваттдан 150 мегаваттгача;
Навоий ИЭСда 450 мегаваттдан 230 мегаваттгача;
Тошкент ИЭСда 370 мегаваттдан 180 мегаваттгача қувват камайган.
Шунингдек, Талимаржон ИЭСнинг умумий қуввати 900 мегаватт бўлган иккита БГҚлари ўчирилди.
Айни пайтда Талимаржон ИЭСда қурилмаларни ишга тушириш жараёни амалга оширилмоқда, қолган электр станцияларда иш режими қайта тикланган. Мазкур ўчиш ҳолатнинг сабаблари ўрганилмоқда.
Яқин соатларда электр энергияси таъминотида қисқа муддатли узилишлар кузатилади. Келтирилган ноқулайликлар учун истеъмолчилардан узр сўраймиз.
Эслатиб ўтамиз, электр энергияси таъминоти билан боғлиқ масалалар бўйича 1154 ҳамда газ таъминоти масалалари бўйича 1104 қисқа телефон рақамларига мурожаат қилишингиз мумкин.
979
