Мазкур объектнинг қурилиши аввало, мавжуд газ тақсимлаш тизими инфратузилмасини кенгайтириш зарурати билан боғлиқ бўлиб, бу ўз навбатида пойтахтнинг меъморий қиёфасини яхшилаш билан бир қаторда, янгидан-янги турар-жой массивларини лойиҳалаштириш ҳамда қўшимча ишлаб чиқариш қувватларини яратишга ҳам замин яратади.
Диаметри 1020 мм ва узунлиги қарийб 8 километрни ташкил этувчи янги газ тақсимлаш тармоғи 13 та автомобил йўли ва 2 та коллекторни кесиб ўтади. Сергели туманидаги қурилиш майдончасига 7930 метр қувур етказиб берилиб, шундан, бугунги кунга қадар 6100 метр қувурларни ўрнатиш ишлари якунланди. Объектдаги қурилишга 80 га яқин мутахассис ва 22 та махсус техника жалб қилинган ва барча иш жараёнлари "Hududgazta'minot" АЖнинг махсус штаби томонидан назорат қилинмоқда.
Газ тақсимлаш тармоғининг фойдаланишга топширилиши пойтахтимиз ягона газ тармоғи ҳалқасини яратиш ва бунинг натижасида истеъмолчиларга барқарор табиий газ етказиб беришни таъминлайди, хусусан, Чилонзор, Учтепа, Яккасарой, Миробод ва Шайхонтоҳур туманларининг табиий газ таъминотини тубдан яхшилаш имконини беради.
Таъкидлаш жоизки, бугунги кунда пойтахтимизда 671 мингдан зиёд жисмоний ва 13 мингга яқин улгуржи истеъмолчилар мавжуд бўлиб, уларга жорий йилда 4 миллиард метр кубдан зиёд табиий газ етказиб берилди, бу ўтган 2019 йилга нисбатан 10 фоизга кўпдир.
"Hududgazta'minot" АЖ матбуот хизмати
866
