"Hududgazta’minot" АЖ Моддий ресурслардан оқилона фойдаланиш ва коррупцияга қарши сиёсатни амалга ошириш бошқармаси ҳамда "Hududgaz Namangan" газ таъминоти филиалининг тегишли бўлими ходимлари томонидан "Ўзнефтгазинспекция" билан биргаликда ўтказилган рейд тадбирлари давомида суюлтирилган газнинг оширилган нархлардаги ноқонуний айланмаси ташкил этилувчи "бункер"ларни аниқлаш бўйича рейд тадбирлари ўтказилди.
Наманган вилояти Наманган туманида ўтказилган тадбир давомида "Навқирон" МФЙ Ўрикзор кўчасида жойлашган 43-уйда, 16 дона маиший газ баллонлари сақланаётганлиги ҳамда ушбу манзилда яшовчи фуқаро Ф.Пўлатов "Namangantumangaz" газ таъминоти бўлими ходими Р.Пўлатовдан 20 килограммлик суюлтирилган газ баллонларни 22 400 сўмдан сотиб олиб, сўнг уларни туман аҳолисига 60 минг сўмдан қайта сотиш билан шуғулланганлиги аниқланди.
Наманган шаҳри "Тошкент" кўчасида жойлашган 73-уйда ташкил этилган яна бир "бункер" фаолияти фош этилди. Фуқаро Б.Бурхоновга қарашли мазкур уйда 94 дона маиший газ баллонлари мавжудлиги ҳамда ушбу фуқарога ҳам "Namanganshahargaz" газ таъминоти бўлими ходимларидан бири ёрдам бериб келгани аниқланди.
Юқоридаги ноқонунуий ҳолатлар бўйича хизмат текширувлари бошланди ва натижалари бўйича барча материаллар ҳуқуқни муҳофаза қилиш органларига топширилади. Шу каби қонунбузарлик ҳолатларини аниқлаш бўйича рейдлар давом этмоқда.
Фурсатдан фойдаланиб, "Hududgazta’minot" АЖ суюлтирилган газ истеъмолчиларига 20 килограмлик маиший газ баллоннинг бир килограммини имтиёзли 1120 сўм нархда сотилишини эслатиб ўтади. Маиший газ баллонлари манзилгача етказилади ва истеъмолчининг талабига биноан, 3000 сўм қўшимча тўлов эвазига уйга олиб кириб ўрнатиб берилади. Маиший фойдаланиш учун мўлжалланган суюлтирилган газ баллонларининг ноқонуний айланмаси ёки олди-сотдиси бўйича маълумотлар тўғрисида 1104, 712021104 ва 712000804 телефон рақамлари орқали хабар беринг.
"Hududgazta’minot" АЖ матбуот хизмати
1106
