Сирдарё вилоятида қуввати 1500 МВт бўлган янги иссиқлик электр станциясининг (ИЭС) қурилиши бошланди. ИЭС ишлаётганда табиий газнинг йиллик тежамкорлиги 2,0 миллиард куб метрни, электр энергияси ишлаб чиқариш эса 10,0 миллиард киловатт соатни ташкил қилади.
Айни пайтда қурилиш майдончасида объектни қуриш учун ер майдонини тайёрлаш ишлари бошланди.
Лойиҳа доирасида бош пудратчи – Хитойнинг China Gezhouba Group Corporation (CGGC), компанияси аниқланди, у объектни “тайёр холда” топшириш асосида қуради. Электр станцияси Сирдарё вилоятининг Боёвут тумани ва Ширин шаҳрида жойлашади.
Лойиҳа Япониянинг MHPS компанияси томонидан ишлаб чиқарилган бўлиб, фойдали иш коэффициенти 60 фоиздан юқори бўлган энг замонавий комбинацияланган цикллардан фойдаланишни назарда тутади.
Эслатиб ўтамиз, Ўзбекистон Республикаси Президентининг 2020 йил 10 августда “Сирдарё вилоятида қуввати 1 500 МВт бўлган янги иссиқлик электр станцияси қурилишини ташкил этиш чора-тадбирлари тўғрисида”ги ПҚ-4799-сонли қарори қабул қилинган эди.
Ушбу ҳужжат билан, Сирдарё вилоятида янги иссиқлик электр станциясини қуриш тўғрисидаги инвестиция шартномаси Ўзбекистон инвестициялар ва ташқи савдо вазирлиги, “The International Company for water and power projects” (Саудия Арабистонинг сув ва энергетика лойиҳалари бўйича компания) ва “Acwa Power Sirdarya” МЧЖ (Лойиҳа компанияси) ўртасида тасдиқланган эди.
Шунингдек, қарор билан “Ўзбекистон миллий электр тармоқлари” АЖ ва “Acwa Power Sirdarya” ўртасида электр энергиясини сотиб олиш тўғрисида келишув тасдиқланди. Шу билан бирга, ушбу лойиҳа компанияси ишлаб чиқарилган электр энергиясини фақат “Ўзбекистон миллий электр тармоқлари” АЖга сотилишини кафолатлайди.
Ўзбекистон Республикаси
Энергетика вазирлиги Матбуот хизмати
3098
