Аввал хабар қилинганидек, энергетика ва сув ресурслари мувозанатини сақлаш, истеъмолчиларни электр энергияси билан барқарор таъминлаш борасида Тожикистон Республикаси билан ҳамкорликда бир қатор инвестицион лойиҳалар амалга оширилмоқда.
Хусусан, “Ўзбекистон миллий электр тармоқлари” АЖ томонидан “Ўзбекистон Республикасида 500 кВли Ғузор – Регар (Л-507) электр узатиш тармоғини тиклаш” инвестицион лойиҳаси амалга оширилмоқда.
Айни пайтда лойиҳа доирасида 500 кВли Ғузор – Регар электр узатиш тармоғининг Ўзбекистон Республикаси ҳудудидаги 63 километр узунликдаги қисмини қайта қуриш ишлари бошлаб юборилди. Ушбу ишлар жорий йилнинг тўртинчи чорагида якунланиши кўзда тутилган.
Лойиҳа Тожикистон Республикаси ва Ўзбекистон Республикаси ўртасидаги савдо-иқтисодий ҳамкорлик бўйича ҳукуматлараро комиссияси баённомаси асосида амалга оширилмоқда. Мазкур лойиҳа – Ўзбекистон ва Тожикистон энергетика тизимларининг параллель ишлаши вақтида электр энергияси ишончлилигини таъминлашга хизмат қилади.
Ўзбекистон Республикаси
Энергетика вазирлиги Матбуот хизмати
1505
