Ўзбекистон Республикаси Энергетика вазирлигининг Илмий-техник кенгаши Ўзбекистон Республикаси Президентининг 2019 йил 1 февралдаги "Ўзбекистон Республикаси ёқилғи-энергетика тармоғини бошқариш тизимини тубдан такомиллаштириш чора-тадбирлари тўғрисида" ПФ-5646-сонли фармони ҳамда 2019 йил 1 февралдаги ПҚ-4142-сонли "Ўзбекистон Республикаси Энергетика вазирлиги фаолиятини ташкил этиш чора-тадбирлари тўғрисида"ги қарорида белгиланган вазифаларни сифатли ва ўз вақтида бажарилишини таъминлаш мақсадида ташкил этилган.
Кенгаш Ўзбекистон Республикаси Энергетика вазирлиги, Энергетика вазирлиги томонидан бошқариладиган ташкилотлар томонидан техник ва технологик сиёсатни, инновацион ва илмий-техник ишланмаларни, мамлакатнинг ёқилғи-энергетика секторини мутаносиб ва комплекс ривожлантириш стратегиясини амалга оширувчи фаолиятини мувофиқлаштирувчи коллегиал органидир.
Кенгаш таркиби камида 11 кишидан иборат бўлади. Бунда Кенгаш аъзоларининг 30 фоизидан кам бўлмаган вакиллари Энергетика вазирлиги ва ташкилотларига алоқадор бўлмаган ходимлардан шакллантирилиб, улар билан белгиланган тартибда махфийликка доир шартнома имзоланади.
Кенгашнинг амалдаги раиси Ўзбекистон Республикаси Энергетика вазири, Кенгаш раисининг ўринбосари Энергетика вазирининг биринчи ўринбосари - "Ўзатом" агентлиги Бош директори ҳисобланади:
Кенгашнинг асосий вазифалари қуйидагилардан иборат:
- республиканинг ёқилғи-энергетика соҳасини янада ривожлантириш концепциялари ва дастурларини шакллантириш, кўриб чиқиш ва амалга ошириш, шунингдек ушбу соҳада ягона техник сиёсатни амалга ошириш бўйича ишларни ташкил этиш;
- ёқилғи-энергетика комплекси объектлари қурилиши лойиҳаларини кўриб чиқиш ва тасдиқлаш, уларнинг бажарилишини назорат қилиш, бу борада ушбу соҳадаги энг муҳим меъёр ва стандартларга амал қилинишини таъминлаш;
- ёқилғи-энергетика соҳасини стратегик режалаштириш ва ривожлантиришнинг мувозанатли тизимини яратиш ҳамда ривожлантириш, энергия манбаларини ишлаб чиқаришни кўпайтириш ва диверсификация қилиш, барча турдаги энергия манбаларини ишлаб чиқариш, етказиб бериш ва истеъмол қилишнинг ўзаро боғлиқ қисқа муддатли, ўрта муддатли ва узоқ муддатли прогнозларини ишлаб чиқиш, шунингдек энергетика соҳасини комплекс ривожлантириш бўйича мақсадли дастурларни ишлаб чиқиш;
- ёқилғи-энергетика соҳасининг инвестицион жозибадорлигини ошириш, шу жумладан, энергия бозорида қулай рақобат ва ишбилармонлик муҳитини шакллантиришни рағбатлантирувчи тариф сиёсатини такомиллаштириш давлат ва хусусий сектор ҳамкорлигини ривожлантириш;
- етакчи муассасаларнинг олимлари ва амалиётчилари иштирокида, маҳсулот унумдорлиги ва сифати, энергия ва ресурсларни тежаш бўйича замонавий талабларга, шунингдек экологик стандартларга жавоб берадиган илғор технологиялар ва асбоб-ускуналарнинг жаҳон бозорини чуқур таҳлил қилиш;
- нефть-газ ва электроенергетика корхоналарининг ишлаб чиқариш жараёнларига энергия самарадорлиги ва энергия тежовчи инновацион технологияларни жорий этишни рағбатлантириш;
- атом станцияларини қуриш йўли билан тинч атом энергиясидан фойдаланишни ривожлантириш, иқтисодиёт тармоқлари ва ижтимоий соҳада энергия таъминоти (табиий газ, суюлтирилган газ, нефть маҳсулотлари, кўмир, электр энергияси ва бошқалар) борасида давлатнинг энергетика сиёсатини амалга ошириш.
