Сирдарё вилояти ҳокимлиги, Энергетика вазирлиги, Иқтисодий тараққиёт ва камбағалликни қисқартириш вазирлиги, “Ўзэнергоинспекция” ҳамда “Ўзнефтегазинспекция” мутахассислари, вилоятдаги корхона, ташкилот ва идоралар ҳамда энергия аудит корхоналари, қайта тикланувчи энергия манбалари ишлаб чиқарувчи корхоналар масъул ходимлари иштирокида энергия самарадорлиги ва қайта тикланувчи энергия манбаларини ривожлантириш, шунингдек, электр ва иссиқлик энергиясини, нефть ва табиий газни тежалишига қаратилган семинар ва давра суҳбати ўтказилди.
Унда Ўзбекистон Республикаси Президентининг 2019 йил 22 августдаги ПҚ-4422-сонли, 2020 йил 10 июлдаги ПҚ-4779-сонли қарорлари ижросини таъминлаш бўйича амалга оширилган ишлар ва келгусидаги истиқболли режалар хусусида тўхталиб ўтилди.
Тадбир иштирокчиларига қуёш фотоэлектр станциялари ва қуёш сув иситиш қурилмалари билан жиҳозлаш тавсия этиладиган давлат органлари ва ташкилотларининг маъмурий бинолари ҳамда инфратузилма объектлари рўйхати тасдиқланганлиги юзасидан маълумотлар берилди.
Юқоридаги қарорларнинг ижросини таъминлаш мақсадида, фотоэлектр станциялари ва қуёш сув иситиш қурилмалари билан жиҳозлаш, шунингдек, бинолар ҳамда иншоотларда ёритиш тизимлари учун светодиодли манбаларни ўз ичига олган сенсорли датчик қурилмаларини ўрнатилиши бўйича Сирдарё вилоятидаги барча корхона ва ташкилотларнинг маъмурий биноларида ўрнатиш бўйича тавсиялар берилди.
“Ўзэнергоинспекция” Сирдарё ҳудудий бўлими томонидан вилоятдаги давлат идоралари ва ташкилотларнинг маъмурий биноларига қуёш фотоэлектр станциялари ва қуёш сув иситиш қурилмаларини ўрнатиш бўйича бошқармаларга, туман ва шаҳарлардаги корхона ва ташкилотларга 800 тадан ортиқ кўрсатма берилиб, бажарилиши назоратга олинган.
Хусусан, юқоридаги қарорларнинг ижросини таъминлаш юзасидан Сирдарё вилоят кўп тармоқли тиббиёт маркази маъмурий биноси, Гулистон шаҳрида жойлашган мономарказ биноси ҳамда Сардоба туманидаги кўп қаватли уйларга жами 240 дан ортиқ қуёш фотоэлектр станциялар ўрнатилди.
Ҳозирги кунда Ховос тумани “Оқчангал” маҳалласида жойлашган “RS SUCSESS AGRO” ҚК МЧЖ томонидан ер майдонларини суғориш учун насосларни ҳаракатга келтириш учун умумий қуввати 280 кВтли қуёш фотоэлектр станциялар ўрнатилиб, қурилиш ишлари давом эттирилмоқда.
2020-2022 йилларда Сирдарё вилоятида жами 10 та йирик корхонада энергетика текшируви ўтказилиши натижасида 7 125 353 тонна шартли ёқилғи тежаш бўйича самарадорликка эришилиши кўзда тутилган.
2020 йилда жадвалга мувофиқ “Сирдарё ИЭС” АЖда энергетика текшируви ўтказилган бўлиб, натижада 4 733,3 минг кВт.соат электр энергияси тежалишига эришилган. 2020 йилда 40 та корхона томонидан энергияни тежаш бўйича тадбирларни ўтказилиши натижасида 2717,94 минг кВт.соат электр энергияси иқтисод қилинган.
Мазкур семинар ва давра суҳбатида тадбиркорлик субъектлари, ижтимоий соҳа ҳамда корхона ва ташкилотлар ходимлари ўзларини қизиқтирган саволларга мутасадди ташкилот вакилларидан атрофлича жавоб олишди. Таклифлар ва мавжуд муаммолар юзасидан фикр-мулоҳаза алмашилди.
Энергетика вазирлиги Матбуот хизмати
