11 та халқаро компания Сурхондарё вилояти Шеробод туманида қуввати кимида 200 МВт бўлган қуёш фотоэлектр станцияси (ФЭС) қурилиши (лойиҳа) учун инвестор танлаш бўйича ўз таклифларини тақдим этмоқда.
Мазкур давлат-хусусий шериклиги асосидаги инвестиция лойиҳасига Ўзбекистон Республикаси Энергетика вазирлиги томонидан Осиё тараққиёт банки (ОТБ) кўмагида инвестор тендер танлови эълон қилинган.
Лойиҳа Ўзбекистон Республикаси Ҳукумати ва ОТБ ўртасидаги Меморандум доирасида амалга оширилаётган қуввати 1 ГВт бўлган қуёш энергиясини ривожлантириш бўйича ОТБ дастурининг бир қисми бўлиб, 2020-2022 йилларга мўлжалланган Инвестиция дастурига киритилган (9.01.2020 йилдаги №ПҚ-4563).
Лойиҳани амалга ошириш учун Сурхондарё вилояти Шеробод туманида танлаб олинган майдончада ўзгарувчан ток қуввати 200 МВт дан кам бўлмаган фотоэлектр (қуёш) станцияси, жумладан 220 кВ кучланишли янги подстанция ва “Сурхон” подстанциясига уланиш учун узунлиги 52 км. бўлган ҳаво электр узатиш тармоғи қурилади.
Эслатиб ўтамиз, Лойиҳанинг тендер қисмини амалга ошириш қуйидаги босқичлардан ўтди.
Жорий йилнинг 1 февраль куни тендер босқичи старт олиб, унда потенциал инвесторлар белгиланган талабларга мувофиқ иштирок этишга қизиқиш билдирди (унинг шакли билан Энергетика вазирлиги, Инвестициялар ва ташқи савдо вазирлиги, Молия вазирлиги ҳузуридаги Давлат-хусусий шериклигини ривожлантириш агентлиги веб-сайтларида танишиш мумкин). Натижада халқаро компаниялардан 54 та ариза келиб тушди ва бу ҳақида оммавий равишда жорий йилнинг 6 март куни эълон қилинди.
Жорий йилнинг 26 июнь куни тендернинг “Талабларга мувофиқлик” босқичи эълон қилинди. Унинг натижаларига кўра, 3 декабрь куни малака босқичидан муваффақиятли ўтган 11 та халқаро компаниянинг «Рўйхати» тақдим этилиб, улар танлов (қийматга оид) таклифлар бериш учун “Таклифлар сўрови”га таклиф этилди.
2021 йил апрель ойида Таклифлар сўрови ва қийматга оид энг яхши таклиф натижалари бўйича ғолиб эълон қилиши кутилмоқда. Лойиҳа келишувлари имзоланиб, молиявий ёпилишга эришилгач, 2022 йилга режалаштирилган электр станцияси қурилиши бошланади.
Ўзбекистон Республикаси
Энергетика вазирлиги Матбуот хизмати
1177
