Жорий йилнинг 16 декабрь куни табиий газга ноқонуний уланишларни аниқлаш мақсадида “Hududgaz Navoiy” газ таъминоти филиали ва “Hududgaz Metrologiya” филиали Навоий бўлими масъул ходимлари томонидан тегишли давлат назорат органлари билан ҳамкорликда вилоят ҳудудидаги ишлаб чиқариш корхоналари ҳамда иссиқхоналарда навбатдаги текширув тадбирлари ўтказилди.
Ўрганишлар давомида, Навоий шаҳрида жойлашган “Асилбек Лобар” МЧЖга қарашли иссиқхонада газ ҳисоблагичга қасддан сим қадаб, ўзбошимчалик билан ташқи таъсир кўрсатиш ҳолати аниқланган.
Ушбу объектда табиий газга ноқонуний уланиб, 150 минг метр куб табиий газ ҳисобга олинмай сарф қилиниши натижасида, газ таъминоти корхонасига етказилган зарар миқдори дастлабки ҳисоб-китобларга кўра, 150 млн сўмдан зиёдни ташкил этмоқда.
Масъуллар иштирокида воқеа жойида зарур ҳужжатлар расмийлаштирилиб, тегишли далолатнома тузилди. Айни вақтда мазкур иссиқхонада ҳосил мавжудлиги инобатга олиниб, объектдаги фойдаланилган табиий газ ҳажми қайта ҳисоб-китоб қилишга йўналтирилди. “Уддабурон” тадбиркорнинг сарф қилинган газ учун тўловларни устомонлик билан тўламаслик режаси “иш бермади” ва моддий манфаат йўлида қилинган қинғир иш фойда ўрнига, ташвиш келтирди.
Юқорида қайд этилган ҳолат бўйича зарур ҳужжат ва материаллар, ҳуқуқни муҳофаза қилиш идораларига топширилди.
“Hududgaz Navoiy” газ таъминоти филиали матбуот хизмати
702
