САВОЛ: Электр энергияси истеъмолини ҳисобга олиш учун ўрнатилган янги ҳисоблагичларда муаммо бор деб ҳисобланган ҳолларда хонадон эгаси қаерга мурожаат қилиши керак – ЭТКгами ёки ўз ХУЖМШга?
ЖАВОБ: Бугунги кунда республикамизнинг барча ҳудудларида замонавий, “ақлли ҳисоблагичлар”ни ўрнатиш ишлари жадал суръатларда олиб борилмоқда. Ҳисоблагичлар ҳудудий электр таъмноти корхоналари томонидан (ТЭТК, ШЭТК) бепул ўрнатилмоқда.
Замонавий ҳисоблагичлар носоз ҳолатга келиши билан боғлиқ масалага тўхталадиган бўлсак, аксарият ҳолларда кўп қаватли уйларда мавжуд электр симларининг эскириш даражаси юқори бўлиб, электр энергиясидан юклама билан фойдаланиш, масалан, бир вақтнинг ўзида турли электр жиҳозларини ишлатиш орқали келиб чиқиши мумкин. Бунда симлар қизиб кетиши натижасида қисқа туташув содир бўлиб, табиийки ҳисоблагич ишдан чиқишига олиб келиши мумкин. Бундай ҳолатда, биринчи бўлиб ХУЖМШ электромонтерини чақиртириш мақсадга мувофиқдир.
Шунинг учун, бундай вазиятда қилиш керак бўлган биринчи иш – бу муаммо ҳақиқатдан ҳам ҳисоблагичнинг ўзида эканлигини визуал равишда аниқлашдир. Агар муаммо ҳисоблагичда эканлигига амин бўлсангиз, ҳудудингиздаги электр таъминоти корхонасига мурожаат қилишингиз керак.
Агар ҳисоблагич билан боғлиқ муаммоларнинг сабаби аниқ бўлмаса, ХУЖМШнинг электромонтёр ходимини чақириш мантиқан тўғри бўлади. Чунки электр таъминоти корхонаси ходими муаммонинг сабаби электр симида эканлигини аниқлагандан кейин ҳам ХУЖМШ ходими хизмати зарур бўлади. Маълумки Сиз томондан тўланган бадалларнинг бир қисми ХУЖМШ томонидан уйнинг ички қисмидаги коммуникция тармоқларини (шу жумладан электр шит ва симлар) таъмирлашга йўналтирилади. Демак, хар бир хонадон эгаси ХУЖМШ мутахассисларининг сифатли хизматидан фойдаланиш ҳуқуқига эга.
Бу ҳақда Ўзбекистон Республикаси Вазирлар Маҳкамасининг 2018 йил 12 январдаги “Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида”ги 22-сонли қарори, 1-иловаси “Электр энергиясидан фойдаланиш қоидалари”нинг 98-бандида алоҳида белгиланган.
Унга кўра, электр энергиясини ҳисобга олиш асбоблари зинапоя (подъезд) майдончаларида ўрнатилган тақдирда, уларнинг сақланиши ва бутлиги учун хусусий уй-жой мулкдорлари ширкати ҳамда тасарруфида уй-жой бўлган идора, ташкилот жавоб бериши шартлиги белгилаб қўйилган. Ушбу банднинг 2-хатбошига кўра, кўп квартирали уйлардаги хонадонлар ва хусусий хонадонлар ичида ўрнатилган ҳисобга олиш асбобларининг сақланиши ва бутунлиги учун истеъмолчи жавоб бериши кўрсатиб ўтилган.
Шунидек, мазкур бандга кўра, кўп квартирали уйлардаги хонадонлар ва хусусий хонадонлар ичида ўрнатилган ҳисобга олиш асбобларининг сақланиши ва бутунлиги учун истеъмолчи жавоб бериши кўрсатиб ўтилган.
Ҳурматли истеъмолчилар! Сиз уй-жой мулкдорлари ширкатларига тўлаётган тўловнинг маълум бир қисми кўп квартирали уйларнинг зинапоя майдончалари ичидаги муҳандислик тармоқлари ва коммуникациялари, ҳисоблагичларни сақлаш ҳамда таъмирлашга йўналтирилади. Шунга мувофиқ, кўп қаватли уйларнинг зинапоя майдончаларида ўрнатилган ҳисоблагичлар ва электр щитлар жавобгарлиги ҳам хусусий уй-жой мулкдорлари ширкатлари зиммасида эканини эслатиб ўтмоқчимиз.
Агар сизда кўп қаватли уйларнинг ички электр тармоқларининг носозлиги ва хавфсизлиги бўйича эътироз ҳамда шикоятлар бўлса, ўзингиз яшаб турган ҳудуддаги Хусусий уй-жой мулкдорларининг ширкатига мурожаат қилишингиз керак.
1643
