Ҳурматли истеъмолчилар!
Жорий йилнинг 27 декабрь куни истеъмолчиларни ёқилғи-энергетика ресурслари билан таъминлаш бўйича амалга оширилган ишлар юзасидан маълумот бериб ўтамиз.
Хусусан, 27 декабрь куни иссиқлик электр станциялари ва гидро электр станциялари орқали 227 миллион киловатт-соат электр энергияси ишлаб чиқарилди. Шундан республика истеъмолчиларига 211 миллион 900 минг киловатт-соат электр энергияси етказиб берилди.
Шунингек, сутка давомида ҳудудий газ таъминоти корхоналари томонидан истеъмолчиларга прогноздаги 94 миллион 696 минг куб метр ўрнига амалда 109 миллион 35 минг куб метр табиий газ етказиб берилди. Шу билан бирга, аҳолига 1 минг 110 тонна суюлтирилган газ етказилди.
Истеъмолчиларни кўмир ва брикет маҳсулотлари билан таъминлаш мақсадида 27 декабрь куни “Ўзбеккўмир” акциядорлик жамияти томонидан 10 минг 902 тонна маҳаллий кўмир маҳсулотлари етказиб берилди.
Магистрал электр узатиш линиялари ва подстанция тармоқларида 512-электр узатиш тармоғида ремонт ишлари давом этмоқда. Талабномага асосан таъмирлаш ишлари 18:00 га қадар этиб белгиланган. Қолган магистрал электр узатиш линиялари ва подстанция тармоқларида узилишлар ёки авариявий ўчишлар мавжуд эмас. Барча электр қурилмалар белгиланган меъёрий иш ҳолатида. Электр қурилмалари фаолияти бўйича эътирозлар мавжуд эмас.
Сурхондарё вилоятининг Музработ тумани, Оби ҳаёт маҳалласида 25 декабрь куни ҳудуддаги қуввати 630 кВА бўлган трансформаторнинг ишдан чиқиши оқибатида электр таъминотида узилиш юзага келган. 26 декабрь куни қуввати 400 кВА кучланишга эга бошқа трансформатор ўрнатилган. Аммо совуқ об-ҳаво туфайли электр энергиясига бўлган эҳтиёжнинг кескин ортиши натижасида ушбу ускуна ҳам ишдан чиққан. Шундан сўнг, кеча 27 декабрь куни “Сурхондарё ҲЭТК” АЖ томонидан юзага келган муаммо бартараф этилган.
Навбатчилик давомида электр энергияси таъминоти бўйича ҳудудларидан қилинган мурожаатлар жойлардаги масъул мутахассисларга етказилди.
Табиий газ етказиб бериш бўйича ишлар режага асосан амалга оширилмоқда. Навбатчиликнинг ўтган вақти давомида табиий газ таъминоти бўйича фуқаролардан мурожаатлар келиб тушмади.
Шунингдек, бугун 28 декабр куни Қарши шаҳарнинг “Жайҳун” кўчасидан ўтган ўрта босимли ер ости газ қувурида газ сизиб чиқиш ҳолати аниқланди. Ушбу аварияни зудлик билан бартараф қилиш мақсадида, соат 16:00 дан 17:00га қадар Қарши шаҳрининг “Мустақиллик қўрғони”, Чаман, Гулшан, Худойзот ва Арал маҳаллаларида вақтинчалик табиий газ таъминоти тўхтатилади. Барча табиий газ истеъмолчиларидан газ жиҳозлари ўчиқ ҳолда эканини назорат қилишлари ва эҳтиёт чораларини кўришлари сўралди.
Шу ўринда истеъмолчилардан иситиш мосламаларига эҳтиёткорлик билан муносабатда бўлишларини, газ ускуналаридан фойдаланишда хавфсизлик қоидаларига қаттиқ риоя қилишларини сўраймиз.
Эслатиб ўтамиз, электр энергияси таъминоти билан боғлиқ масалалар бўйича 1154 ҳамда газ таъминоти масалалари бўйича 1104 қисқа телефон рақамларига мурожаат қилишингиз мумкин.
718
