Сўнгги йилларда мамлакатимизда энергетика тармоғининг ажралмас бўғини ҳисобланган гидроэнергетика соҳасида изчил ислоҳотлар амалга оширилмоқда.
Халқимизнинг турмушини янада яхшилаш, фаровонлигини ошириш, ҳаёт сифатини юксалтириш, маиший эҳтиёжларини қондириш, бу борада, кундалик ҳаётнинг асосий қувват манбаи бўлган электр энергия соҳасини янада ривожлантириш, ишлаб чиқариш қувватларини ошириш, хусусан, қайта тикланувчи электр энергиясини ишлаб чиқариш борасида “Ўзбекгидроэнерго” АЖ томонидан инвестициявий лойиҳалар асосида изчил ишлар олиб борилмоқда.
Жамият томонидан янги ГЭСларни қуриш ҳамда узоқ йиллардан буён ишлаб келаётган ГЭСларни замон талаблари асосида модернизация қилишга қаратилган улкан лойиҳалар бирин-кетин фойдаланишга топширилмоқда.
“Ўзбекгидроэнерго” АЖ томонидан электр энергияси ишлаб чиқариш ва реализация қилиш, самарали лойиҳалар асосидаги инвестиция маблағларини ўзлаштириш, янги гидротехник объектларни эксплуатацияга топшириш, узоқ йиллар мобайнида ишлаб келаётган ГЭСларни модернизация қилиш, ишлаб чиқаришдаги маҳаллийлаштириш жараёнларини кенгайтириш борасидаги ишлар қизғин равишда амалга оширилмоқда.
Бугун, 28 декабрь куни Тошкент шаҳридан унча узоқ бўлмаган Зангиота туманида оқиб ўтувчи Бўзсув каналида жойлашган ГЭС-14 нинг модернизация жараёнидан сўнг, янги қувватларда электр энергия ишлаб чиқаришга қаратилган фаолиятининг ўзига хос рамзий очилиш маросими ташкил этилди.
Белгиланган режа асосида олиб борилган катта ҳажмдаги модернизация ишлари натижасида ГЭС-14 қуввати 2 маротаба оширилиб, ҳар бирининг қуввати 7,5 МВт бўлган иккита гидроагрегат ўрнатилди ҳамда ГЭСнинг умумий қуввати 15 МВтга етказилди. Гидроагрегатлар комплекси тўлиқ синовлардан ўтказилиб, ишга туширилди.
Таъкидлаш жоизки, ушбу ГЭС-14 нинг юқори қувватларда ишга туширилиши ҳудуд иқтисодиёти, саноат корхоналари ривожи, халқимиз фаровонлиги, маҳаллий аҳоли маиший турмушининг янада яхшиланиши йўлидаги муҳим қадамлардандир.
Алоҳида қайд этиш жоизки, ГЭС-14 модернизацияси жараёни жорий 2020 йилда юқори суръатларда давом эттирилиб, фидойи гидроэнергетик ишчи-ходимлар томонидан олиб борилган изчил ва самарали фаолият, юқори саъй-ҳаракатлар натижасида белгиланган муддатларда якунига етказилди.
Янги қувватларда фаолият юритишни бошлаган ГЭС-14 Тошкент вилоятининг 50-60 мингга яқин аҳоли хонадонларини электр энергиясига бўлган талабини самарали қондиришга хизмат қилади.
Таъкидлаш жоизки, соҳа мутахассисларининг жонкуярлиги ҳамда машаққатли меҳнатлари натижасида юртимизнинг гидроэнергетика салоҳияти тобора юксалмоқда.
Гидроэнергетика соҳасининг тараққиёти мамлакатимизда электр энергияси ишлаб чиқариш қувватларини ошириш билан бирга, янги ГЭСлар қурилаётган, модернизация қилинаётган гидротехник иншоотлар ҳудуди аҳолисининг турмуш фаровонлигини ошишига, ишлаб чиқариш субъектларининг электр қувватлари билан таъминланишига, том маънода, ҳудудларнинг ободлигига замин яратади.
“Ўзбекгидроэнерго” АЖ Ахборот хизмати
1440
