Ҳурматли истеъмолчилар!
Жорий йилнинг 7 январь куни истеъмолчиларни ёқилғи-энергетика ресурслари билан таъминлаш бўйича амалга оширилган ишлар юзасидан маълумот бериб ўтамиз.
Хусусан, кеча, 7 январь куни иссиқлик электр станциялари ва гидро электр станциялари орқали 221 миллион 200 минг киловатт соат электр энергияси ишлаб чиқарилди. Шундан республика истеъмолчиларига 216 миллион 600 минг киловатт соат электр энергияси етказиб берилди.
Шунингек, сутка давомида ҳудудий газ таъминоти корхоналари томонидан истеъмолчиларга жами 102 миллион 510 минг метр куб табиий газ етказиб бериш режалаштирилган ҳолда амалда 113 миллион 147 минг метр куб табиий газ етказиб берилди. Шунингдек, республика истеъмолчиларига жами 1 минг 864 тонна суюлтирилган газ етказиб берилди.
Истеъмолчиларни кўмир ва брикет маҳсулотлари билан таъминлаш мақсадида 7 январь куни “Ўзбеккўмир” акциядорлик жамияти томонидан 10 минг 311 тонна кўмир маҳсулотлари етказиб берилди.
Қорақалпоғистон ГТФ хабарига кўра, 2021 йил 7 январь куни Қўнғирот туманида ОФЙ Намунави ҳамда Нукус туманида ОФЙ Акмангит диаметри 219 да ремонт ишлари олиб борилиши сабабли 7 январь куни соат 15:00 дан 17:00 гача табиий газ етказиб бериш вақтинча тўхтатилди.
Қарши шаҳрининг “Жайҳун” кўчасидан ўтган ўрта босимли ер ости қувурида газ сизиб чиқиш ҳолати аниқланди. Ушбу аварияни зудлик билан бартараф этиш мақсадида, 2021 йил 7 январь куни соат 15:00 дан 17:00 га қадар Қарши шаҳрининг Худойзот, Гулшан, Самарқанд, Чаман, “Мустақиллик қўрғони” ҳамда Отчопар маҳаллаларида табиий газ таъминоти тўхтатилди.
Тошкент шаҳар Мирзо Улуғбек тумани Паркент (35 кВ) подстанцияда янги трансформатор пункти ишга туширилади. Шу муносабати билан “Тўрон”, “Олмачи”, “Олтинтепа”, “Катта Олтинтепа”, “Подшобоғ” ва “Мирзакалон Исмоилий” маҳаллалари ҳудудида бугун 7 январь куни соат 23:45дан соат 02:00га қадар электр энергия узатишда қисқа муддатли узилишлар кузатилади.
Бугун 8 январь куни соат 10:27да ва 10:31да Талимаржон ИЭСнинг 2- ва 3- буғ-газ қурилмаларида (жами 900 МВт қувват) энергоблок технологик ҳимоясининг ишлаши натижасида ушбу БГҚлари фаолияти тўхтатилган.
Бунинг натижасида, республиканинг айрим ҳудудлари бўйлаб электр энергияси таъминотида умумий 446 МВт қувватда чеклов киритилмоқда.
Ҳозирги вақтда юзага келган тўхтатилиш сабаблари аниқланмоқда.
Эслатиб ўтамиз, электр энергияси таъминоти билан боғлиқ масалалар бўйича 1154 ҳамда газ таъминоти масалалари бўйича 1104 қисқа телефон рақамларига мурожаат қилишингиз мумкин.
746
