Жорий йилнинг 24 январь куни Ўзбекистон Республикаси Энергетика вазири Алишер Султонов Саудия Арабистони Қироллиги инвестициялар вазири Xалед ал-Фалех билан музокаралар ўтказди.
Музокаралар Сирдарё вилоятининг Ширин шаҳрида “ACWA Power” компанияси иштирокида қуввати 1500 МВт бўлган иссиқлик электр станцияси қурилишининг расмий очилиш маросими арафасида бўлиб ўтди. Учрашув аввалида Xалед Ал-Фалех Саудия Арабистони делегациясининг Ўзбекистонга ташрифи пандемия оқибатида юзага келган узоқ давом этган карантиндан кейинги хорижга илк сафари эканини қайд этди.
Инвестициялар вазири 2017 йилдаги Тошкент шаҳрига сўнги ташрифидан бери Ўзбекистон иқтисодиёти трансформацияси 100 йилга илгарилаб кетганини таъкидлади. Энергетика секторида ҳам мисли кўрилмаган ўзгаришлар рўй берди, электр энергиясини ишлаб чиқариш ҳажми ҳам ортмоқда, қуёш ва шамол энергетикаси соҳаси ҳам ривожланмоқда.
Арабистон томони замонавий босқичда Ўзбекистонда бизнес юритишдаги очиқлик ва профессионаллик алоҳида қайд этилди, бунга мамлакат Президентининг лидерлик фазилатлари туфайли эришилгани ва бу йирик инвесторлар ҳамда энергетика компанияларига Ўзбекистоннинг истиқболли энергетика бозорига кириб келиш имконини берганини таъкидлади.
Xалед Ал-Фалех шунингдек, “ACWA Power” томонидан амалга оширилаётган Сирдарё вилоятида иссиқлик электр станциясини қуриш лойиҳаси Саудия Арабистони компаниялари томонидан мамлакат иқтисодиётининг бошқа соҳаларида амалга оширилаётган кенг кўламли инвестициялар учун фақат бошланиши эканлигига ишонч билдирди.
Шунингдек делегация раҳбари томонидан Ўзбекистон Президентининг илмий марказ ташкил этиш орқали водород энергетикасини ривожлантириш бўйича стратегик қарори ҳам алоҳида қайд этилди. Саудия томони Ўзбекистонда “ACWA Power” компанияси билан ҳамкорликда илмий-тадқиқот маркази ташкил этиш бўйича бошланаётган лойиҳаси доирасида водород энергетикаси соҳасида ҳамкорлик қилишдан умиди катта эканини таъкидлади.
Саудия Арабистони босқичма-босқич анъанавий энергия манбаларидан экологик тоза энергия манбаларига ўтиш бўйича стратегияни амалга оширмоқда. Xалед Ал-Фалех таъкидлашича, Ўзбекистон минтақада энг йирик энергетика қироли бўлиш учун зарур салоҳиятга эга ва бу борада Саудия Арабистони стратегик ҳамкор бўлиш, катта ҳажмдаги инвестициялар ва водород энергетикаси сингари илғор технологиялар жалб қилиш, шунингдек малакали кадрларни ўқитиш дастурини жорий этишга тайёр эканини қайд этди.
Музокаралар якунида томонлар энергетика соҳасидаги ҳамкорликни ривожлантиришга келишиб олди.
Ўзбекистон Республикаси
Энергетика вазирлиги Матбуот хизмати
1024
