Амалга оширилаётган тарғибот ва кўплаб огоҳлантиришлар ҳамда белгиланган тартибда чоралар кўрилганига қарамай, “Электр энергиясидан фойдаланиш қоидалари”га риоя қилмаслик ҳолатлари аниқланмоқда. 2020 йил декабрь ва 2021 йил январь ойларида “Ўзэнергоинспекция” Наманган ҳудудий бўлими ва “Наманган ҲЭТК” АЖ билан биргаликда жами 21 та қоидабузарлик ҳолатлари маълум бўлиб, 182 330 647 сўм ҳисобга олинмаган электр энергия миқдори қайта ҳисоб-китоб қилинди.
Хусусан, Наманган шаҳри Давлатобод тумани ҳудудида жойлашган “Ботир Мухаммадали” МЧЖ электр тармоғига ўзбошимчалик билан ноқонуний уланиб фойдаланганлиги аниқланди. Мазкур қоидабузарликдан сўнг ўрнатилган тартибда далолатнома расмийлаштирилди. Ўзбекистон Республикаси Вазирлар Маҳкамасининг 2018 йил 12 январдаги 22-сонли қарори билан тасдиқланган “Электр энергиясидан фойдаланиш қоидалари”га асосан 24 840 000 сўм ҳисобга олинмаган электр энергияси миқдори ҳисобланди.
Бу каби ҳолат Чуст тумани “Ободонлаштириш” бошқармасида ҳам кузатилди. Унга кўра 16 372 000 сўм ҳисобга олинмаган электр энергияси миқдори ҳисобланди.
Жорий йилнинг 20 январь куни Чортоқ туманидаги 6-, 18- ва 28-сонли мактабгача таълим муассасаларида қоидабузарлик ҳолатлари аниқланиб, “Электр энергиясидан фойдаланиш қоидалари”га асосан жами 5 850 000 сўм ҳисобга олинмаган электр энергияси миқдори ҳисобланди.
Ўтказилган ўрганишлар давомида “Ўзэнергоинспекция” Наманган ҳудудий бўлими мутахассислари томонидан тадбиркорлик субъектлари ва ижтимоий соҳа ходимларига амалдаги электр энергетикасига оид қарор ва қоидалар бўйича тушунтиришлар берилди.
“Ўзэнергоинспекция” Матбуот хизмати
860
