Бугун 11 февраль куни Ўзбекистон миллий матбуот марказида “Иссиқлик электр станциялари” АЖ раҳбарияти иштирокида жорий қиш-баҳор мавсуми давомида электр энергияси ишлаб чиқариш ишларининг барқарорлигини таъминлаш масалаларига бағишланган матбуот анжумани бўлиб ўтди.
Унда жорий йил қиш-баҳор мавсуми давомида электр энергияси ишлаб чиқариш ишларининг барқарорлигини таъминлаш, аҳоли хонадонлари, қолаверса иқтисодиёт тармоқлари ва ижтимоий объектларга сифатли иссиқлик ва электр энергияси етказиб бериш масалалари юзасидан маълумот берилди.
Таъкидлаш лозимки, иссиқлик электр станциялари томонидан электр энергиясини ишлаб чиқариш ҳажми 2020 йилда 60,75 млрд. кВт/соатни ташкил этиб, режа кўрсаткичи 103,8 фоизга бажарилди ва ўсиш суръати 2019 йилга нисбатан 107,7 фоизни ташкил этди.
Ёқилғи ресурсларни иқтисод қилиш комплекс чора-тадбирларини амалга ошириш ҳисобига 1 млрд. 241,1 млн. куб табиий газ иқтисод қилинди.
Ишлаб чиқариш корхоналаридаги асосий ва ёрдамчи ускуналарни 2020-2021 йиллар куз-қиш мавсумига пухта тайёрлаш бўйича 8 та энергоблок, 15 та қозон агрегати, 1 та турбоагрегат, 4 та буғ-газ қурилмаларини мукаммал ва ўрта таъмирлаш ишлари амалга оширилди. Ушбу ишларга 318 млрд. 414,4 млн. сўмлик сарфланди.
Матбуот анжуманида соҳа мутасаддилари томонидан ушбу йўналишда амалга оширилаётган ишлар ҳақида маълумотлар ҳамда ОАВ вакиллари, журналист ва блогерларни қизиқтирган саволларга жавоблар берилдди.
Инвестиция сиёсати, электр энергиясини ишлаб чиқариш таннархини пасайтириш, модернизация лойиҳалари бўйича ҳам ахборотлар тақдим этилди.
“Иссиқлик электр станциялари” АЖ Матбуот хизмати.
761
