Жорий йилнинг 12 февраль куни Энергетика вазирлиги томонидан И.М.Губкин номидаги Россия давлат нефть ва газ университетининг Тошкент шаҳридаги филиалида буюк шоир ва мутаффаккир Алишер Навоийнинг 580 йиллиги ва Заҳириддин Муҳаммад Бобур таваллудининг 538 йиллиги муносабати билан маънавий-маърифий тадбир ташкил этилди.
Тадбирда Энергетика вазирлиги марказий аппарати ва вазирлик тизимидаги ташкилотлар ходимлари, навоийшунос олимлар, филиал профессор-ўқитувчилари ва талабалари ҳамда оммавий ахборот воситалари вакиллари иштирок этдилар.
Ўзбекистонга оид хориждаги маданий бойликларни тадқиқ этиш маркази етакчи илмий ходими, филология фанлари доктори Афтондил Эркинов, Алишер Навоий номидаги Тошкент давлат ўзбек тили ва адабиёти университети доценти, филология фанлари номзоди Гулбаҳор Ашурова тадбир иштирокчиларини икки улуғ алломалар ижод оламидан яна бир бор баҳраманд этишди.
Мутаффакирларимиз Навоий ва Бобур ўз асарларида адабиёт, фалсафа, тарих, сиёсатшунослик, ахлоқшунослик, тилшунослик каби соҳаларни қамраб олган ҳолда, борлиқ ва унинг моҳиятини идрок этиш, комил инсон тарбияси, ватанпарварлик, адолат, одоб-ахлоқ, тасаввуф, илоҳий ишқ ва лирик муҳаббат мезонларини юксак чўққига кўтариб, бутун инсоният тамаддунига беқиёс ва ўчмас ҳисса қўшган бой мерос ҳақида гапирилиб, уларнинг асарларини ўқиб-ўрганиш инсон маънавий дунёсининг бойишига хизмат қилиши таъкидланди.
Тадбир давомида Алишер Навоий ва Заҳириддин Муҳаммад Бобур ҳаёти ва ижодига бағишланган “Энг яхши иншо”, “Энг яхши видеоролик” ва “Энг яхши сурат” йўналишларида эълон қилинган танлов ғолиблари вазирликнинг фахрий ёрлиқлари ва эсдалик совғалари билан тақдирланди.
Маънавий-маърифий тадбир якунида Алишер Навоий ва Заҳириддин Муҳаммад Бобур ғазаллари ва рубоийларидан намуналар ўқилди. Бўлиб ўтган тадбир иштирокчиларда катта таассурот қолдирди.
Энергетика вазирлиги Матбуот хизмати
1119
