Энергетика вазири ўринбосари Беҳзот Нарматов Наманган вилоятининг Чортоқ туманида бўлиб, туман ҳокимининг биринчи ўринбосари ва ҳудудий электр ва газ таъминоти корхоналари раҳбарлари билан биргаликда ушбу туман истеъмолчиларини табиий газ ва электр энергияси билан барқарор таъминлаш бўйича олиб борилаётган ишлар ҳамда мавжуд муаммолар билан яқиндан танишди.
Хусусан, Дўстлик ва Мустақиллик МФЙлар ҳудудида жойлашган кўп қаватли уйларда яшовчи аҳоли билан мулоқот қилиниб, ҳудудий корхона раҳбарларига кераклик кўрсатмалар берилди. Ўрнатилган қўлбола иситиш ускуналари ва газ плиталар ёрдамида уйларни иситиш билан боғлиқ бўлган хавфлар ҳақида тушунтириш ишалари олиб борилди.
Бундан ташқари, Дўстлик (янги массив) МФЙда қурилган ва қурилаётган замонавий кўп қаватли биноларнинг газ ва электр энергияси инфратузилмаси кўздан кечирилди.
Шунингдек, “Ҳудудгазтаъминот” АЖнинг Чортоқ тумани филиалида истеъмолчиларга хизмат кўрсатиш сифатини ошириш бўйича амалга оширилган ишлар билан яқиндан танишилди. Бу борада, вилоятда амалга оширилган ишлар натижасида истеъмолчиларга яратилган қулайликларга юқори баҳо берилди.
Суҳбат давомида истеъмолчиларга кўрсатилаётган хизматлар сифатини янада ошириш бўйича кераклик кўрсатмалар берилди. Бундан ташқари, 2021-2022 йиллар куз-қиш мавсумига пухта тайёргарлик кўриш масалалари маҳаллий ҳокимият, ҳудудий электр ва газ таъминоти корхоналари раҳбарияти билан биргаликда муҳокама қилиниши натижасида мавжуд режаларга керакли ўзгартиришлар киритишга келишилди.
Маълумот учун: туманда жами 33 минг 921 нафар истеъмолчиларга замонавий АСКУЭ талабига мос электр ҳисоблагичлар ўрнатилди.
Шунингдек, 2021 йилда мазкур туман истеъмолчиларининг электр энергияси таъминотини яхшилаш мақсадида, 30 дона турли қувватдаги трансформатор пунктлари ҳамда узунлиги 74,4 км. бўлган электр узатиш тармоғи янгидан қурилади. Шу билан бирга 49 дона трансформатор пунктини ҳамда 134,7 км. электр узатиш тармоғида мукаммал таъмирланиш, 113 дона трансформатор пунктини ҳамда 193,2 км. электр узатиш тармоғида жорий таъмирлаш ишлари режалаштирилган.
“Чортоқ тумангаз” газ таъминоти бўлими томонидан жами 39 минг 104 та истеъмолчига хизмат кўрсатиб келинмоқда. Шундан аҳоли табиий газ истеъмолчилари сони 12 минг 459 та ҳамда 125 та улгуржи истеъмолчиларни ташкил қилади.
Тумандаги табиий газ етиб бормайдиган ҳамда табиий газ билан газлашмаган аҳоли хонадонларини узлуксиз равишда суюлтирилган газ билан таъминлаш мақсадида, 2020 йил январ-декабрь ойларида 3 758,3 тонна суюлтирилган газ етказиб берилди.
Бундан ташқари, туман газ таьминоти бўлими томонидан 2020-2021 йил куз-қиш мавсумини талофатсиз ўтказиш, мавжуд газдан оқилона фойдаланиш, газдан фойдаланишда газ хавфсизлик қоидаларига қатъий риоя этиш, газдан захарланиш, ёнғин ҳолатларининг олдини олиш, газ плитаси ва ясама иситиш анжомларидан фойдаланмаслик тўғрисида тумандаги кўп қаватли уй-жойларда тарғибот ишлари олиб борилмоқда.
Тумандаги аҳоли хонадонларига куз-қиш мавсумида узлуксиз равишда табиий ва суюлтирилган газ етказиб бериш мақсадида, бўлимда авария хизмати учун 1 дона Дамас, 1 дона Газел, 4 дона Исузу, 1 дона Shacman автомашиналари ажратилган.
Энергетика вазирлиги Матбуот хизмати
924
