Аввал хабар берганимиздек, 2020 йилнинг 5 март куни Саудия Арабистоннинг “АCWА Power” компанияси билан Ўзбекистон ўртасида умумий қуввати 1500 МВт бўлган янги иссиқлик электр станцияси қурилиши ва ундан 25 йил давомида электр энергиясини сотиб олиш бўйича Инвестиция келишуви ҳамда Электр энергиясини сотиб олиш шартномаси имзоланган эди.
Жорий йилнинг 4 март куни “АCWА Power” компанияси лойиҳанинг энг муҳим босқичи бўлган молиялаш ишларини муваффақиятли якунлади. Умумий қиймати 1,2 млрд. АҚШ доллари бўлган лойиҳасига 747 млн. АҚШ доллар миқдорида Халқаро ривожланиш банклари ва чет эл хусусий тижорат банклари томонидан кредит ажратиладиган бўлди.
Кредит шартномаларининг муддати 18 йил бўлиб, ушбу 18 йилнинг дастлабки 3 йили давомида қурилиш ишлари амалга оширилади.
Кредиторлар - Европа тикланиш ва тараққиёт банки, Нефть экспортчи мамлакатлар ташкилоти (OPEC)нинг Халқаро тараққиёт жамғармаси, Немис Инвестиция Корпорацияси (DEG), Standard Chartered Bank (Буюк Британия), Natixis (Франция), Societe Generale (Франция) ва Хитой банки.
Электр станциясини қуриш лойиҳасида молиялаш ишлари жуда муҳим босқич ҳисобланади. Кредит шартномаларнинг имзоланганлиги Ўзбекистонга инвестиция киритишда нафақат хусусий энергия ишлаб чиқарувчилар томонидан, балки халқаро молия институтлари ва халқаро хусусий тижорат банклари томонидан юксак ишончни англатади.
Энергетика вазирлиги давлат кафолатларисиз, яъни мамлакатнинг ташқи қарзларини оширмаган ҳолда шу каби йирик хусусий инвестицияларни жалб қилиш бўйича ишларни давом эттиради.
Ўзбекистон Республикаси
Энергетика вазирлиги Матбуот хизмати
1132
