Қашқадарё вилоятининг Муборак туманида “Ижобат” газ конденсатли кони очилди.
Президент Шавкат Мирзиёев 2020 йилнинг 12-13 ноябрь кунлари Қашқадарёга қилган ташрифи давомида ҳудудда углеводород хомашё захираларини кўпайтириш бўйича бир қатор топшириқлар берганди.
Хусусан, “Ижобат” газ конденсатли конининг очилиши ҳам сўнгги бир неча ой давомида олиб борилган геология-қидирув ишлари натижаси ҳисобланади.
“Ўзбекнефтгаз” АЖ Бошқарув раиси Меҳриддин Абдуллаев мазкур кон фаолияти билан танишди ва ҳудудда келгусида режалаштирилаётган ишларга тўхталди.
“Давлатимиз раҳбари ўтган йили Қашқадарёга ташрифи доирасида қанча газ ишлаб чиқарилса, шунга яраша унинг захираси ҳам яратилиши керак, дея топшириқ берганди. Биз шундан сўнг Давлат геология ва минерал ресурслар қўмитаси, тажрибали мутахассислар ва институтлар билан келишган ҳолда Муборак ва Шўртан ҳудудида геология ишларини кучайтирдик. Мана шу кўриб турганимиз, “Ижобат” кони ҳам шу изланишлар натижаси бўлди, албатта. Қашқадарё ҳудудида ҳар йили 25 млрд. кубдан ортиқ газ қазиб чиқарилган бўлса, атиги 4-5 млрд. куб атрофида захира яратиларди. Жорий йилда ўнта структурада иш олиб боряпмиз, ҳудуднинг ўзида камида 20 млрд куб захира яратишни мақсад қилганмиз. Бунинг учун барча имкониятларимиз етарли ва бу борада соҳада етакчи бўлган давлатлар билан самарали ҳамкорлик қилиб келяпмиз”, – деди Меҳриддин Абдуллаев.
Жорий йилнинг 19 март ҳолатига кўра, “Ижобат-1” қудуғи 2021 метр чуқурликкача бурғиланди ва ушбу жараёнда маҳсулдор қатламнинг 2021-1708 метр чуқурлик оралиғидан саноат миқёсидаги табиий газ оқими олинди.
Қудуқдан олинган табиий газнинг дастлабки эркин кунлик дебити 200 минг метр кубни ташкил қилмоқда.
Яқин муддат ичида “Ижобат-1” қудуғида маҳсулдор қатламнинг босими, ҳарорати ва кон-геологик параметрларини аниқлаш ҳамда унинг саноат миқёсида қазиб чиқариш қувватини аниқлаш мақсадида геологик тадқиқот ишлари олиб борилади.
Маълумот ўрнида айтиш мумкин, “Ижобат” майдонининг ўлчами 10,5 кв. км.ни ташкил этиб, табиий газ ресурси 5 млрд. 632 млн. м3 ва конденсат ресурси эса 248 минг тоннани ташкил этади.
Жорий йил якунига қадар, “Ижобат” конида “Ўзбекнефтгаз” АЖ бўйича 2021 йилга мўлжалланган углеводород хомашё базасини ривожлантириш ва қайта ҳосил қилиш дастури доирасида яна иккита излов қудуқларида бурғилаш ишларини олиб бориш режалаштирилмоқда.
Истиқболли ҳудудлардаги 19 та янги майдонда бурғилаш ишлари олиб борилиши режалаштирилган бўлиб, шундан Муборак нефт газ қазиб чиқариш бошқармаси ҳудудларида жорий йилнинг бугунги ҳолатида ушбу майдонлардан учтасида бурғилаш (“Ижобат”, “Раззоқбобо”, “Чорбоғ”), биттасида (“Истиқбол”) бурғилаш дастгоҳининг монтаж ишлари олиб борилмоқда.
1044
