«Иссиқлик электр станциялари» АЖда молиявий ҳисоботларнинг халқаро стандартлари (МҲХС)га ўтиш жараёнини такомиллаштириш мақсадида бухгалтер-кадрлар билими ва салоҳиятини оширишга алоҳида эътибор қаратилмоқда.
Мазкур йўналишдаги ишлар самарадорлигини ошириш мақсадида «Иссиқлик электр станциялари» АЖ ва унинг тизим корхоналарида «Бухгалтерларни халқаро сертификатлаш доирасида корпоратив ўқитиш» лойиҳасига старт берилди. Лойиҳа «IBS Tashkent» маркази билан ҳамкорликда амалга оширилади.
Лойиҳанинг тақдимот онлайн-учрашувида АCCA GOLD статусига эга «IBS Tashkent» маркази мутахассислари билан музокаралар бўлиб ўтди. Унда марказ томонидан 2 босқичда 50 нафар бухгалтерия ходимлари ўқитилиши белгилаб олинди.
– Мутахассисларни халқаро стандартлар бўйича тайёрлаш орқали, МҲХСга ўтишни жадаллаштиришга ва молиявий ҳисоботларнинг шаффофлиги таъминланишига эришилади. Натижада, хорижий инвесторларни жалб қилиш ва халқаро молия бозорларига кириш имкониятлари яратилади, - дейди «Иссиқлик электр станциялари» АЖ Бош бухгалтер ўринбосари - МҲХС бўлими бошлиғи А.Аҳмаджонов.
Эслатиб ўтамиз, 2020 йил 24 февралда Ўзбекистон Республикаси Президентининг ПҚ-4611-сонли «Молиявий ҳисоботнинг халқаро стандартларига ўтиш бўйича қўшимча чора-тадбирлар тўғрисида»ги Қарори эълон қилинган эди. Қарорга мувофиқ акциядорлик жамиятлари 2021 йил якунига қадар халқаро сертификатлаш доирасида “МҲХС бўйича молиявий ҳисобот” фанини муваффақиятли топширганлиги тўғрисида ҳужжатга ёхуд халқаро бухгалтер сертификатларидан (АССА, СРА, CIPA, DipIFR) бирига эга камида уч нафар мутахассис-бухгалтер билан таъминланиши белгилаб қўйилган.
“Иссиқлик электр станциялари” АЖ матбуот хизмати.
1251
