Ўзбекистон Республикаси Энергетика вазирлиги томонидан 2021 йилнинг 19-23 май кунлари ёқилғи-энергетика комплексининг биринчи ёшлар Форуми ўтказилади.
Жорий йил 27 февраль куни Сирдарё вилоятининг Ширин шаҳрида Энергетика вазири Алишер Султонов томонидан ёқилғи-энергетика соҳасидаги ёшлар билан очиқ-мулоқот учрашувида ушбу ташаббусга кўрсатма берилди.
Суҳбат чоғида ёш мутахассислар ва талабалар ёқилғи-энергетика соҳасида фаолият юритаётган бўлажак мутахассислар ва ёшлар ўртасида яқин алоқаларни йўлга қўйиш, тажриба, ташаббус, фикр алмашишга қаратилган қатор таклиф ва ташаббуслар билан чиқишди. Ушбу таклифларга мувофиқ, Энергетика вазири ёшлар форуми ва бошқа тадбирларни ташкил этиш, ижодкор ва мақсадли ёшларни қўллаб-қувватлашга қаратилган бошқа тадбирларни ўтказишга топшириқ берди.
“Ёшлик энергияси” халқаро форумида – Россия Федерацияси, Озарбайжон, Беларус, Қозоғистон, Тожикистон ва Қирғизистон давлатларининг ёшлари иштирок этадилар.
Бу йил Энергетика вазирлиги илк бор энергетика тизимидаги акциядорлик жамиятлари ва ташкилотлари вакиллари – турли касб ва ижтимоий фаолият бўйича энг истеъдодли ва фаол ёшлар делегацияларини қабул қилади. Форум иштирокчиларининг умумий сони 500 нафардан ташкил қилиб, жумладан, ёқилғи-энергетика йўналишидаги таълим муассасаларида таҳсил олаётган талабалар иштирок этади.
Форум ижтимоий фаол, иқтидорли ёшларни аниқлаш, уларнинг профессионал ва ижодий ваколатларини такомиллаштириш, энергетика тизими компаниялари ва ташкилотлари, хорижий компаниялар ва касаба уюшмаларининг фаол ёшлари ўртасида ҳамкорликни ташкил этишга кўмаклашиш мақсадида ўтказилади.
Мамлакат энергетика соҳасининг ривожланиши, соҳа ёшларининг саъй-ҳаракатлари ва муваффақиятларига ҳам боғлиқ. Форумнинг асосий ғояси “Баркамол ёшлар – юрт таянчи!” шиори билан белгиланади. Уни амалга ошириш доирасида ёшларга қуйидаги йўналишлар бўйича маҳорат дарслари таклиф этилади: “Карьера”, “Шахсий ўсиш ва ўз-ўзини ривожлантириш”, “Етакчилик”, “Ижтимоий фаоллик” ва бошқалар.
Форум иштирокчилари Энергетика вазирлигида ёшлар билан ишлашнинг асосий хусусиятлари билан танишиш ва ўз ташкилотларининг ёшлар сиёсати соҳасидаги фаолиятини тақдим этиш имконига эга бўладилар. Бундан ташқари, Форум доирасида ёшлар учун Қашқадарё вилоятининг нефть-газ ва энергетика объектларига экскурсиялар ўтказилади.
Таъкидлаш жоизки, жорий йил бошидан бери илмий анжуманлар, тренинглар, маҳорат дарслари, шунингдек ёшлар учун спорт тадбирлари ўтказиб келинмоқда. Ушбу тадбирлар Энергетика вазирлиги томонидан Ўзбекистон энергетика, нефть ва газ саноати ва геология ходимлари касаба уюшмаси Республика Кенгаши, ёқилғи-энергетика мажмуи ташкилотлари ва ихтисослаштирилган институтлар билан биргаликда ташкил этилмоқда. Бундан ташқари, соҳа ёшларининг мамлакат ёқилғи-энергетика объектларига, шунингдек, ички туризмни ривожлантиришга қаратилган саёҳатларни ўрганиш бўйича экскурсилар ташкил этиш режалари ишлаб чиқилмоқда.
Форум иштирокчилари ёшлар ўртасида ягона корпоратив маданиятни шакллантириш, ёш мутахассисларнинг касбий, техник, корпоратив ва бошқарув кўникмаларини ривожлантириш, уларни инновация, тадқиқот ва лойиҳа фаолиятига жалб этиш, ёш мутахассисларнинг муаммоларини ўрганиш ва уларни биргаликда ҳал этиш каби масалаларни муҳокама қиладилар.
Форум натижаси тадбирнинг асосий ғоясини рағбатлантиришга қаратилган тематик майдонлар иштирокчиларининг таклифларини акс эттирувчи якуний дастур ҳужжати бўлади.
Ўзбекистон Республикаси
Энергетика вазирлиги Матбуот хизмати
1362
