Жорий йилнинг 5 апрель куни энергетика вазири Алишер Султанов Татаристон Республикаси Бош вазири ўринбосари, Саноат ва савдо вазири Альберт Каримов бошчилигидаги делегация билан музокаралар ўтказди.
Учрашув 5-7 апрель кунлари Тошкентда илк бор ўтказилаётган “ИННОПРОМ” Халқаро саноат кўргазмаси доирасида бўлиб ўтди.
Мулоқот чоғида Татаристон вакиллари ёқилғи-энергетика комплекси (Ўзбекистон ЁЭК), шунингдек “Ўзбекэнерго” АЖни қайта ташкил қилиш, “Ўзбекнефтьгаз” АЖни реструктуризация қилиш бўйича амалга оширилаётган ислоҳотлар бориши билан танишди. Ислоҳотлар натижасида ишлаб чиқариш, транспортировка қилиш, тақсимлаш ва сотишни ташкил қилишнинг замонавий усулларига ўтилиши таъминланди. Халқаро молиявий институтлари билан ҳамкорликда энергия манбалари, электр энергияси ва газнинг ягона бозорини шакллантириш ишлари амалга оширилмоқда.
Томонлар ҳамкорликнинг жорий ҳолати, хусусан “Татнефть” ОАЖ билан ҳамкорликда инвестициявий лойиҳалар амалга оширилишини муҳокама қилди.
Учрашув чоғида “ИННОПРОМ” кўргазмасида иштирок этиш учун Тошкентга келган Татаристоннинг қатор компаниялари имкониятлари тақдим этилди. Ўзбекистон энергетика бозорида инжиниринг хизматлари, хусусан турли ишлаб чиқарувчиларнинг газ-турбина двигателларига сервис ва таъмирлаш хизматини тақдим этишга тайёр бўлган “УК “КЭР-Холдинг” МЧЖ шулар жумласидандир.
Қувур маҳсулотларини ишлаб чиқарувчи “НТЗ “ТЭМ-ПО” АЖ энергетика мажмуаси ҳамда нефть ва газ тармоғи корхоналари билан ҳамкорлик қилишдан манфаатдор. 2013 йилдан бошлаб компаниянинг ишлаб чиқариш қуввати йилига 700 минг тонна қувур маҳсулотларини ташкил этди.
“Елабуга автомобиль заводи ишлаб чиқариш бирлашмаси” АЖ машинасозлик маҳсулотлари, жумладан нефтни қайта ишлаш тармоғи учун махсус техника, йўл-қурилиш, коммунал ва автомобиль эҳтиёт қисмлари ва бошқа махсус техника турларини ишлаб чиқаради. “ПО ЕлАЗ” қудуқларни бурғулаш, таъмирлаш ва уларга хизмат кўрсатиш учун мобиль ускуналар ишлаб чиқариш бўйича кучли учталикка киради. Компаниянинг ҳамкорлари орасида “Газпром”, “НК Роснефть”, “Лукойл”, “Татнефть”, “Газпромнефть” сингари компаниялар бор.
Россия ва халқаро стандартлар асосида компрессор ускуналарини ишлаб чиқарувчи “Казанькомпрессормаш” АЖ 1951 йилда ўз фаолиятини бошлаган. Компания “НК “Роснефть” ОАЖ, “Газпром” ОАЖ, “Газпром нефть” ОАЖ, “Новатэк” ОАЖ, “Норильский Никель” ТМК, “ЛУКОЙЛ” ОАЖ ва кўплаб бошқа компаниялар билан муваффақиятли ҳамкорлик тажрибасига эга.
“Қозон моторсозлик ишлаб чиқариш бирлашмаси” АЖ газ-турбина двигателлари технологик ускунаси ҳамда улар асосида табиий газни транспортировка қилиш ва тақсимлаш ускунаси етказиб беришдан манфаатдор. У Россиянинг энг йирик машинасозлик корхоналаридан бири бўлиб, нефть ва газ ҳамда энергетика компаниялари томонидан амалга оширилаётган магистрал газ қувурларини реконструкция қилиш ва кенгайтириш, газлаштириш, генерация қилинадиган янги қувватларни ишга тушириш сингари лойиҳаларни амалга ошириш бўйича бой тажрибага эга.
Учрашувда тоғ-кон саноати учун асбоб-ускуналар ишлаб чиқарувчи “РИМЕРА-АЛНАС” МЧЖ, энергия таъминоти ва тақсимоти, шунингдек АТ йўналиши бўйича ечимлар интегратори ҳисобланган “Питон Кама” МЧЖ ўз имкониятларини тақдим этди.
Музокаралар чоғида томонлар ҳамкорликни янада кенгайтириш мақсадида Ўзбекистон ва Татаристон Республикаларининг етакчи компаниялари фаолияти бўйича батафсил маълумот алмашишга келишиб олди.
Ўзбекистон Республикаси
Энергетика вазирлиги Матбуот хизмати
879
