“Иссиқлик электр станциялари” АЖ томонидан маҳаллаларда ободонлаштириш ишларини олиб бориш, “Обод кўча” ва “Обод хонадон” мезонларини кенг тарғиб этиш, фуқароларни ижтимоий қўллаб-қувватлаш, аҳоли бандлигини таъминлаш бўйича Тошкент шаҳрининг Яшнобод тумани “Асалобод” маҳалласида амалий ишлар олиб борилмоқда.
Айни пайтда маҳалла ҳудудида асфальт ётқизиш ишлари якунига етказилди, 4 та болалар майдончаларини бунёд этилди, қувонарлиси ёшларни оммавий спорт ва жисмоний тарбияга жалб этиш борасида футбол, баскетбол ва волейболга ихтисолашган спорт майдони қуриб фойдаланишга топширилди.
– Юртбошимиз томонидан олдимизга қўйилган муҳим вазифалардан бири бу ёшлар орасида соғлом турмуш тарзини тарғиб этиш, уларни маънан етуклиги билан бир қаторда, жисмоний баркамоллигини ҳам таъминлаш, - дейди маҳалла раиси Ф.Ҳодиев. – Бугун фойдаланишга топширилган бу каби спорт майдончалари айни шу эзгу мақсадларга хизмат қилиши аниқ.
Ўтган давр давомида маҳалла ҳудудида бунёдкорлик ва ободонлаштириш ишлари олиб борилди. Хусусан, маҳалла ҳудуди ободонлаштирилиб, мевали ва манзарали кўчатлар ўтқазилди. Кам таъминланган, боқувчисини йўқотган, ногирон, ижтимоий ҳимояга муҳтож “Темир дафтар”га киритилган оилалар, шунингдек, “Аёллар дафтари”да рўйхатда турувчи эҳтиёжманд хотин-қизларнинг йигирма нафарига озиқ-овқат маҳсулотлари ҳамда маиший техника воситалари тақдим этилди.
Айни пайтда маҳаллада ижтимоий ҳимояга муҳтож, боқувчисини йўқотган оилалар хонадонларини таъмирлаш, аҳоли бандлигини таъминлаш борасида ишчи гуруҳи ўз фаолиятини давом эттирмоқда.
Амалга оширилган ишларга айни пайтгача 460 млн. сўмдан ортиқ маблағ сарфланди, шу билан бирга олдинда турган навбатдаги чора-тадбирлар босқичма-босқич бажарилиши режалаштирилган.
“Иссиқлик электр станциялари” АЖ Матбуот хизмати
958
