2021 йилнинг 15 февралда Энергетика вазирлиги томонидан энергия тежаш ва энергия самарадорлигини ошириш мавзусини энг яхши ёритиш бўйича “Save Energy” танлови эълон қилинди. Танлов иштирокчилари томонидан шу кунга қадар 44 та ариза, жумладан, 13 та видео, 19 та мақола ва 12 та постер тақдим этилди.
Ғолибларни танлашнинг асосий мезонлари энергияни тежаш ва энергия самарадорлиги мавзусини ёритишда оммабоплик, ўзига хослик ва холисликдан иборат.
Танлов ёшларнинг эътиборини табиий ресурсларни сақлашни таъминлаш зарурлигини ва аҳолини энергия манбаларидан самарали ва эҳтиёткорлик билан фойдаланиш учун жалб қилишга қаратилган.
Ҳужжатларни қабул қилиш ишлари 2021 йилнинг 15 апрель куни ниҳоясига етди. Ишлар ўзбек ва рус тилларида қуйидаги номинациялар бўйича тақдим этилди:
1. Энг яхши ижтимоий видеоролик;
2. Энг яхши ижтимоий баннер (баннер, постер, сурат);
3. Энг яхши мақола.
Ҳозирги кунда танлов ҳайъати ғолибларни аниқлаш учун материалларни танлов комиссиясига ўтказиш бўйича якуний ишларни олиб бормоқда.
Эслатиб ўтамиз, ғолибларга номинация бўйича 10 000 000 сўмдан 20 000 000 сўмгача пул мукофотлари топширилади.
Танловнинг бош ҳомийси “ЛУКОЙЛ Узбекистан Оперейтинг Компани” МЧЖ.
Танлов шартлари билан http://minenergy.uz/uz/lists/view/133 ҳавола орқали танишиш мумкин.
Ўзбекистон Республикаси
Энергетика вазирлиги Матбуот хизмати
581
