Ўзбекистон Республикаси Энергетика вазири Алишер Султанов бошчилигидаги делегация 2021 йилнинг 20-21 апрель кунлари хизмат сафари билан Римга (Италия) ташриф буюрди.
Сафар давомида “Pietro Fiorentini”, “Terranova”, “Danieli”, “Amec Foster Wheeler – WOOD” компаниялари, шунингдек, Италиянинг SACE экспорт кредит агентлиги ва Италия Ташқи ишлар вазирлиги раҳбарлари билан учрашувлар ўтказилди.
Учрашувлар доирасида “АСКУГ” дастурий таъминоти, МТО технологияси, газ тўлдириш станциялари, Ўзбекистон газ ташиш тизимини лойиҳавий модернизация қилиш соҳасидаги ҳамкорлик масалалари муҳокама қилинди.
Хусусан, музокаралар чоғида “Pietro Fiorentini” ва “Terranova” компаниялари “Технопарк” МЧЖда “ақлли” газ ҳисоблагичларни ишлаб чиқариш лойиҳаси учун дастурий таъминотни такомиллаштириш мақсадида ҳамкорлик имкониятларини, шунингдек, иссиқхоналар, газ тўлдириш шохобчалари ва бошқа саноат объектлари учун саноат газ ҳисоблагичларини чуқур маҳаллийлаштирилган ҳолда ишлаб чиқаришни ташкил этишни муҳокама қилдилар. Шунингдек, газ ташиш тизимини рақамлаштириш ва модернизация қилишда хорижий томоннинг иштироки, Ўзбекистон энергетика соҳасида ягона “биллинг” тизимини яратиш имконияти яратилди.
“Amec Foster Wheeler – WOOD” компанияси билан технологик ва кимёвий йўналиши президенти Джузеппе Зуккаро ҳамда технологик жараёнлар ва энергетика директори хоним Роса Доменики МТО технологияси ёрдамида газ-кимё мажмуасини қуриш лойиҳаларини амалга ошириш масалалари муҳокама қилинди. Унда хорижий томон яратилаётган ишлаб чиқаришнинг муваффақиятли ишлашини таъминлаш учун Ўзбекистонда мутахассислар тайёрлашга тайёрлигини билдирди.
Ўзбекистондаги лойиҳаларни молиялаштириш масалалари Ўзбекистон делегацияси ва Италиянинг SACE экспорт кредит агентлиги ўртасидаги музокаралар мавзуси бўлди. Агентлик Бош ижрочи директори Жаноб Пиерфранчеcко Латини бир қатор соҳаларда истиқболли лойиҳаларни молиялаштириш, жумладан, “ақлли” табиий газ ҳисоблагичларини ишлаб чиқаришни кенгайтириш, Ўзбекистон газ ташиш тизимини модернизация қилиш ва Бухоро вилоятида МТО технологияси ёрдамида газ-кимё мажмуасини қуриш имкониятини ўрганишга тайёрлигини билдирди.
Ўзбекистон делегацияси билан учрашувда Италия ташқи ишлар ва халқаро ҳамкорлик вазири ўринбосари Манлио Ди Стефано Италияга бўлажак олий даражадаги ташрифнинг муҳимлигини алоҳида қайд этди.
Хориж томони “Италия – Марказий Осиё” форматидаги иккинчи Вазирлар анжуманини Ўзбекистонда ўтказишга тайёрлиги учун алоҳида миннатдорчилик билдирди.
Шу билан бирга, М. Ди Стефано SACE билан ҳамкорликни кенгайтиришни қўллаб-қувватлашини билдирди ва Италия ҳукумати SACEни Ўзбекистондаги лойиҳаларни молиялаштиришда кўпроқ масъулиятни ўз зиммасига олишини таъкидлади.
Музокаралар натижасида томонлар ҳамкорлик масалаларини янада ривожлантириш бўйича келишувга эришдилар.
Ўзбекистон Республикаси
Энергетика вазирлиги Матбуот хизмати
1082
