Ўзбекистон Ҳукумати ва Европа тикланиш ва тараққиёт банки ўртасида 2050 йилга келиб миллий энергетика сектори углерод нейтраллигига эришиш мақсадида узоқ истиқболли ҳамкорлик бўйича ўзаро англашув меморандуми имзоланди.
Томонларнинг ҳамкорлиги Ўзбекистоннинг мамлакат энергетика секторини уни аста-секин декарбонлаш учун ўзгартириш бўйича стратегиясини илгари суришга қаратилган.
Келишув доирасида ЕТТБ молиялаштириш, хусусан қайта тикланувчи энергия манбалари (ҚТЭМ) асосида кенг кўламли электр станциялари лойиҳаларини ишлаб чиқиш ва амалга ошириш, замонавий электр тармоқларини модернизация қилишга оид ечимларни амалга ошириш, эски, самарасиз иссиқлиқ электр станцияларни фойдаланишдан чиқариш, шунингдек газ генерацияси паркини модернизация қилиш ва қайта ихтисослаштиришда техник кўмак ва ёрдам кўрсатишни режалаштирмоқда.
ЕТТБ биринчи вице-президенти Юрген Ригтеринкнинг сўзларига кўра, Ўзбекистон энергетикасини декарбонлаш бўйича йўл харитасини ишлаб чиқиш “Банкнинг мамлакатдаги стратегик устувор йўналишларини акс эттириб, Япония ҳуқумати томонидан қўллаб-қувватланган”.
ЕТТБ сўровига кўра Япония ҳукумати Ўзбекистон энергетика тармоғининг паст углеродли келажакка ўтиши бўйича “йўл харитаси”ни тайёрлашда молиявий кўмак кўрсатди.
Шу билан бирга, Ўзбекистон ва ЕТТБ ҳамкорлиги 2017 йилда янги сурат билан ривожланишни бошлаганини қўшимча қилмоқчимиз. Ўзбекистонда ўз фаолиятини бошлагандан то ҳозирги вақтга қадар ЕТТБ 92 та лойиҳа учун 2 миллиард евродан ортиқ, жумладан умумий қиймати қарийб 1 миллиард доллар бўлган 7 та лойиҳага сармоя киритган.
Ўзбекистон Энергетика вазирлиги паст углеродли энергетика ҳақида 2020 йилнинг майида эълон қилган эди. Мамлакатимиз углерод чиқариш даражаси паст бўлган энергия манбалари, жумладан атом энергиясидан тинчлик мақсадларда фойдаланиш, қуёш, гидро ва шамол энергиясини ривожлантиришга алоҳида эътибор қаратишни мақсад қилди.
Ўзбекистон Республикаси
Энергетика вазирлиги Матбуот хизмати
926
