Туркиянинг “Cengiz Enerji” компанияси томонидан Қибрай туманида барпо этилаётган иссиқлик электр станцияси қурилиши лойиҳаси доирасида 3000 дан зиёд мевали ва манзарали кўчат экилди.
Туркиянинг “Cengiz Enerji” компанияси томонидан Тошкент вилоятида қуввати 240 МВт бўлган буғ-газ электр станциясини қуриш ишлари амалга оширилмоқда. Станция Тошкент вилоятининг Қибрай тумани ҳудудидаги 4 гектар ер майдонида барпо этилмоқда.
Ушбу ажратилган ер майдонида жами 95 туп манзарали дарахтлар мавжуд бўлиб, уларнинг илдиз қисмига шикаст етказмаган ҳолда бошқа жойга кўчириб ўтказиш ва уларни суғориш ишлари “Cengiz Enerji” томонидан олиб борилмоқда.
Шунингдек, кўкаламзорлаштириш ишларига кўмаклашиш мақсадида компания томонидан станция худудида ҳамда Қибрай туманининг бошқа ҳудудларига 3000 тупдан зиёд мевали ва манзарали дарахтлар экиб берилди. Келгусида ушбу дарахтларнинг кўкарувчанлиги ва уларни суғориш ишларини ўз вақтида амалга ошириш ишлари ушбу компаниянинг маҳаллий “CENERGO” МЧЖ лойиҳа компанияси томонидан амалга оширилади.
Маълумот учун: Президентиз Шавкат Мирзиёевнинг жорий йил 2 февралда “Тошкент вилоятида қуввати 240 МВт бўлган навбатдаги иссиқлик электр станцияси қурилишини ташкил этиш чора-тадбирлари тўғрисида”ги қарорига асосан Тошкент вилоятининг Қибрай туманида қуввати 240 МВт бўлган иссиқлик электр станцияси қурилмоқда.
Ҳужжатга асосан, Инвестициялар ва ташқи савдо вазирлиги ва Туркиянинг Cengiz Enerji (инвестор) ва Cenergo (лойиҳа компанияси) ўртасида инвестиция битими имзоланган.
Шунингдек, “Ўзбекистон миллий электр тармоқлари” АЖ ва “Cenergo” ўртасида электр энергиясини сотиб олиш тўғрисидаги битим тасдиқланган. Шартномага мувофиқ, “Cenergo” ишлаб чиқарилган электр энергиясини ЎзМЭТга сотишни, ЎзМЭТ эса уни 25 йил давомида кафолатланган тарзда сотиб олишни ўз зиммасига олади.
Мазкур станция жорий йилнинг декабрь ойида ишга туширилиши режалаштирилган.
Ўзбекистон Республикаси
Энергетика вазирлиги Матбуот хизмати
976
