Электр тармоқларига ўзбошимчалик билан уланиш ва бошқа суистеъмол қилиш ҳолатларини олдини олиш мақсадида Энергетика вазирлиги ҳузуридаги “Ўзэнергоинспекция” ва бир қатор мутасадди ташкилотлар ҳамкорлигида ўтказилаётган қўшма рейд тадбирида қоида бузилиш ҳолатлари аниқланмоқда.
Хусусан, электр энергияси етказиб бериш ҳамда истеъмол қилиш борасидаги қонун ҳужжатлари ижросининг бажарилиши юзасидан 2021 йил 29 мартда “Ўзэнергоинспекция” Қашқадарё ҳудудий бўлими томонидан “Қашқадарё ҳудудий электр тармоқлари корхонаси” АЖ ва Ғузор туман электр таъминоти корхонаси ходимлари иштирокида Ғузор туман Пахтазор МФЙда жойлашган “Китоб ип йигирув” АЖнинг электр энергиясидан фойдаланиши юзасидан ўрганиш ўтказилди.
Ўрганиш давомида “Китоб ип йигирув” АЖ тасарруфидаги 1000 кВАли трансформатор пунктида электр ҳисоблагич ўрнатилган бўлиб, бироқ Ғузор ТЭТК билан шартнома тузмасдан мазкур корхона томонидан электр энергиясидан ноқонуний равишда фойдаланиб келинаётганлиги аниқланди.
Ўрганиш натижасига асосан таъминотчи томонидан “Китоб ип йигирув” АЖга ноқонуний равишда электр энергиясидан фойдаланиб келаётганлиги ҳолати бўйича далолатнома расмийлаштирилиб, ҳуқуқни муҳофаза қилувчи органларга топширилди. Шунингдек, электр энергияси тўлови учун 2 093 105 535 сўм қайта ҳисоб-китоб қилинди ҳамда тармоқдан ажратилди.
“Ўзэнергоинспекция” Матбуот хизмати
841
