БРЮССЕЛЬ, 5 май. Ўзбекистоннинг Бенилюкс мамлакатларидаги элчихонаси Брюссель матбуот клубида Сурхондарё вилоятида 1,55 ГВт сиғимли комбинациялашган иссиқлик электр станцияси (ИЭС) лойиҳасини амалга оширишга бағишланган «Иқтисодий ўсишни рағбатлантириш ва янги иш ўринларини яратиш воситаси сифатида Ўзбекистонга инновацион Европа инвестицияларини илгари суриш» мавзусидаги кўргазма ташкил этди.
Эслатиб ўтиш ўринли бўладики, жорий йил 19 апрель куни «Ўзбекистон миллий электр тармоқлари« АЖ ва «Stone City Energy» (Нидерландия) компанияси ўртасида давлат-хусусий шериклиги (ДХШ) доирасида янги иссиқлик электр станциясини қуриш бўйича инвестиция шартномаси ҳамда ушбу иссиқлик электр станцияси учун электр энергиясини ДХШ тамойиллари асосида сотиб олиш тўғрисида битим имзоланган эди.
Қуввати 1560 МВт бўлган иссиқлик электр станциясини қуриш лойиҳасининг қиймати 1,2 миллард долларга тенг. Лойиҳа 2024 йил охирига қадар ишга туширилиши режалаштирилган. Корхона фойдаланишга топширилгач, 2 мингдан зиёд янги иш ўрнининг яратилиши кўзда тутилган. Лойиҳа Сурхондарё вилояти Ангор туманидаги 150 гектар майдонда барпо этилади.
Кўргазманинг очилиш маросимда Бенилюкс бизнес ҳамжамияти вакиллари, Европанинг қатор етакчи таҳлил марказлари, Европа Иттифоқи институтлари, Энергетика Хартияси котибиятининг раҳбарияти, шунингдек, оммавий ахборот воситалари вакиллари иштирок этди.
Тадбир доирасида «Ўзбекистон энергетика секторига янги Европа мега-инвестициялари», «Ўзбекистон билан инвестиция прогнози ва ҳамкорлиги», «Ўзбекистон билан энергия самарадорлиги ва бошқа соҳалардаги ҳамкорлик», «Инвестиция муҳити ва Ўзбекистон билан халқаро ҳуқуқий механизмлар ўртасидаги ҳамкорликнинг аҳамияти» ва бошқа мавзулардаги тақдимотлар ўтказилди.
Давлат-хусусий шериклиги доирасида тўғридан-тўғри хусусий хорижий инвестициялар орқали амалга оширилаётган лойиҳа Президентимизнинг очиқ, прагматик ва чуқур ўйланган ташқи сиёсат олиб бориши, иқтисодиётни ташқи инвесторларга очиш, энергетика соҳасини тубдан ислоҳ қилиш, унга замонавий билим ва технологияларни жалб этишга қаратилган ташаббуслари туфайли амалга оширилгани алоҳида таъкидланди.
Янги ИЭС қуриш лойиҳаси тақдимоти чоғида «Siemens Energy» (Германия) компаниясининг сўнгги ускуналари Марказий Осиё миқёсида энг самарали энергияни ишлаб чиқариш учун жалб этилиши алоҳида қайд этилди.
Энергетика хартияси котибияти Бош котиби Урбан Руснак Сурхондарё вилоятида амалга оширилаётган мазкур лойиҳада фойдаланилаётган ускуналарнинг юқори самарадорлиги Ўзбекистоннинг иқтисодий тараққиётига ҳам, атроф-муҳитни муҳофаза қилишга ҳам кўмаклашишини таъкидлади. “Бундай катта кўламдаги лойиҳанинг давлат-хусусий шериклиги асосида амалга оширилиши мамлакат иқтисодиётининг етуклигини намоён этади. У аҳоли ва корхоналар учун энергия таъминоти барқарорлигини таъминлашга хизмат қилади», - деди у.
847
