Маҳаллаларда "маҳаллабай" ишлаш тизими асосида аниқланган камчиликларни бартараф этиш, муаммолари ҳал этиш, пировардида аҳоли турмуш шароитини яхшилаш мақсадида энергетика тизими ташкилотлари ўзига бириктирилган ҳудудлардаги маҳаллаларга амалий ёрдам кўрсатишда давом этяпти. Хусусан, “Ўзтрансгаз” АЖ томонидан Тошкент шаҳри Яшнобод туманидаги "Яшнобод" ва "Наврўзобод" МФЙ ободлигига муносиб ҳисса қўшиляпти.
Айни жараёнларнинг боришини жойларга чиқиб ўрганиш, ижросини назорат қилиш мақсадида “Ўзтрансгаз” АЖ Бошқарув раиси ва унинг ўринбосари айни маҳаллаларда бўлишди.
Жорий йилнинг март ойида "Яшнобод" ва "Наврўзобод" маҳаллалари ободлигига ҳисса қўшиш мақсадида унинг ҳудудига манзарали ва мевали кўчатлар экилди. Бу билан чекланиб қолинмай, “Яшнобод” МФЙ биноси ёнида усти ёпиқ, 60 ўринга мўлжалланган ўриндиқли айвонча қуриш ишлари олиб бориляпти. Бу пенсия олишга келган ёши улуғлар учун айни муддао. Шунингдек, МФЙ учун компьютер жамламасини харид қилиш, маҳалла аҳли, хусусан ёшлар бўш вақтини мароқли ўтказишлари учун кутубхона ташкил этиш, спортзал қуриш ва уни жиҳозлаш ишлари ҳам олиб бориляпти.
“Наврўзобод” маҳалласи ҳудудида эса яқин кунларда болалар майдончаси қад ростлайди. Бу ҳам болакайлар учун айни муддао.
Шунингдек маҳалларларда юритилаётган “Темир дафтар”, “Аёллар дафтари” ва “Ёшлар дафтари”га киритилган оилалар, хотин-қизлар ва ёшларнинг бандлигини таъминлаш, уларни қўллаб-қувватлашнинг бошқа чораларини кўриш юзасидан ҳам зарур тадбирлар олиб бориляпти.
"Ўзтрансгаз" Матбуот хизмати
828
