Энергетика вазирлиги томонидан 9 май – Хотира ва қадрлаш кунига бағишлаб иккинчи жаҳон урушида – халқларнинг тинчлиги, миллатлар тотувлиги йўлида қурбон бўлганлар хотираси ёдга олиниб, узоқ йиллар мобайнида ёқилғи-энергетика соҳасида хизмат қилиб келган фахрийлар иштирокида байрам тадбири бўлиб ўтди.
Тадбирда Ўзбекистон Республикаси Энергетика вазирлиги раҳбарияти, шунингдек, ёқилғи-энергетика комплекси соҳасида узоқ йиллар мобайнида фидокорона хизмат қилиб келган, айни пайтда ҳам соҳа ривожи учун меҳнат қилаётган 100 нафардан зиёд фахрийлар иштирок этишди.
Бўлиб ўтган учрашувда фахрийлар учун ушбу улуғ айём кунларида ифторлик дастурхони ёзилиб, урушда ҳалок бўлганлар, шунингдек соҳада хизмат қилиб ўтганларнинг руҳларига бағишлаб Қуръон тиловат қилинди. Мамлакатимиз, хусусан энергетика соҳаси ривожи йўлида хизмат қилаётган барча ходимлар ҳаққига дуолар қилинди.
Юртимизда 9 май – Хотира ва қадрлаш куни сифатида кенг нишонланиши анъанага айланган. Хусусан, Президентимизнинг 2021 йил 20 апрелдаги “Хотира ва Қадрлаш кунига тайёргарлик кўриш ва уни ўтказиш чора-тадбирлари тўғрисида”ги қарорида мамлакатимизда ушбу санани кенг нишонлаш, Иккинчи жаҳон урушида фашизм устидан қозонилган ғалабага муносиб ҳисса қўшган, мустақиллик йилларида хизмат бурчини бажариш чоғида ҳалок бўлганлар хотирасини абадийлаштириш, барча фахрийларга ҳурмат-эҳтиром кўрсатиш алоҳида таъкидланган.
Тадбирда фахрийларимиз томонидан халқимизнинг тарих саҳифаларига ўчмас ҳарфлар билан битилган уруш ва меҳнат фахрийларининг жасорати, мардлик ва матонати, олижаноблиги, меҳр-муруввати ва юксак маънавияти, чеккан заҳматли меҳнатлари олдида таъзим қилиш, бугунги тинч ва осойишта ҳаётимизга шукроналар қилиш, мустақилликдек азиз неъматнинг қадрига етиш, уни кўз қорачиғимиздек асраб-авайлаш лозимлиги таъкидланди.
Шунингдек, ёқилғи-энергетика комплекси соҳасида узоқ йиллар мобайнида фидокорона хизмат қилиб келган фахрийларнинг хонаданларига ташриф буюрилиб Энергетика вазирлиги томонидан байрам совғалари топширилмоқда.
Ўзбекистон Республикаси
Энергетика вазирлиги Матбуот хизмати
1240
