Андижон вилоятида “Узэнергоинспекция” бошлиғи Умаржон Эгамбердиев иштирокида 2021 йил 24 март куни фуқаролар ҳамда ёш тадбиркорлар иштирокида сайёр қабул бўлиб ўтган эди.
Балиқчи туманида ташкил этилган учрашувда аҳоли учун муҳим ва уларни қийнаб келаётган муаммолар бўйича мурожаатлар “Узэнергоинспекция” бошлиги томонидан тўлиқ назоратга олиниб, мутасадди ташкилот вакиллари ҳамкорлигида муаммоларни ҳал этиш юзасидан кўрсатмалар берилган эди. Орадан икки ой вақт ўтди. Сайёр қабулда кўтарилган мурожаатлар натижаси нима бўлди? Уларнинг ижроси таъминландими?
“Узэнергоинспекция” Матбуот хизматининг маълум қилишича ўтган учрашувда кўтарилган масалардан бири Балиқчи тумани “Кўл қилич бурхон” кўчасида истиқомат қилувчи фуқаролар томонидан ушбу маҳаллада қурилиши якунланмаган трансформатор пункти ҳамда 10 кВли ҳаво линияси бўйича мурожаат килган эди. Ҳозирда ушбу ҳудудга 11 дона ОГ-2 траверс, 70 дона ШФ-10 изолятор ҳамда 1300 метр АС-35 русумли очиқ симлар олиб келиниб, қурилиш ишлари якунланди.
Мурожаатлар ижроси бўйича мавзуни давом эттирсак. Балиқчи тумани “Шеробод” МФЙда яшовчи фуқаро Хайрулло Бозоров 55 900 339 сўм, “Кулбуйи” МФЙда яшовчи фуқаро Нурилло Содиқов 924 759 сўм, “Авесто” МФЙда яшовчи фуқаролар Гулнора Абдуллаева 2 011 585 сўм ва Алишер Исмоилов 1 047 458 сўм элеткр ҳисоблагичларида нотўғри кўрсатгичлар киритилиши оқибатида қарздорликлар мавжудлиги бўйича мурожаат қилишган эди. “Узэнергоинспекция” Андижон ҳудудий бўлими мутахассислари томонидан муаммолар жойида ўрганилиб қайта хатловдан ўтказилганидан сўнг: “Шеробод” МФЙда яшовчи фуқаро Хайрулло Бозоров 615 000 сўм қарздорлик, “Кулбуйи” МФЙда яшовчи фуқаро Нурилло Содиқов 174 345 сўм қарздорлик, “Авесто” МФЙда яшовчи фуқаролар Гулнора Абдуллаева 24 780 сўм ва Алишер Исмоилов 68 100 сўм хақдорлиги аниқланиб фуқароларни мурожаатлари қаноатлантирилди.
Балиқчи тумани “Полвонкўл” МФЙда яшовчи фуқаро Гулнорахон Рўзиматова томонидан хонадонида иккита оила истиқомат қилиб, ушбу оилалар учун алоҳида ҳисоблагич ўрнатиб бериш учун мурожаат қилган эди. Ушбу мурожаат мутахассислар томонидан ўрганилиб, Гулнорахон Рўзиматова хонадони учун алоҳида замонавий электр ҳисоблагич ўрнатилиб мурожаатнинг ижроси таъминланди.
Ўтган сайёр қабулда кўтарилган муаммоларнинг ижобий ечим топиши юзасидан Балиқчи тумани “Кўл” МФЙ раиси И.Ортиқов томонидан “Узэнергоинспекция” бошлиғи У.Эгамбердиевга алоҳида миннатдорлик билдирилди.
843
