Энергетика вазири ўринбосари Беҳзот Нарматов раҳбарлигидаги ишчи гуруҳ томонидан Сурхондарё вилоятида истеъмолчиларни табиий ва суюлтирилган газ билан бир маромда таъминлаш ҳамда табиий газни ҳисобга олиш ва назорат қилишнинг автоматлаштирилган тизимини (АСКУГ) жорий этиш бўйича олиб борилаётган ишлар ўрганилди.
Хусусан, 2020-2021 йил куз-қиш мавсумида истеъмолчиларга табиий ва суюлтирилган газ етказиб берилишида йўл қўйилган камчиликлар танқидий таҳлил қилинди. Жорий мавсумда ушбу камчиликларга йўл қўймаслик бўйича мутасаддиларга белгиланган чора-тадбирларни юқори даражада ташкил этилиши юзасидан топшириқлар берилди.
Шунингдек, вилоят истеъмолчиларини энергия-ресурслари билан сифатли таъминлаш учун ишлаб чиқилган давлат дастурлари ва бу борадаги тегишли топшириқларнинг ўз вақтида бажарилишини таъминлаш, келиб тушаётган мурожаатлар ва уларнинг ижро ҳолати билан танишилди.
Маълумот учун, жорий йилда вилоят истеъмолчиларига жами 439 миллион куб метр табиий газ етказиб берилади. Бу ўтган мавсумга нисбатан 23,3 миллион куб метрга кўпни ташкил қилади. Истеъмолчиларни табиий газ билан таъминлаш учун 20 та газ тақсимлаш станцияси, узунлиги 2 397,4 км бўлган газ қувурлари ва 2 541 та газ тақсимлаш пунктларидан фойдаланилади.
Бугунги кунга қадар 3 км газ қувурлари мукаммал таъмирланди, 3,7 км газ қувурлари реконструкция қилинди, 650 та газ тақсимлаш пунктлари техник тафтишдан ўтказилди. Куз-қиш мавсумини беталофат ўтказиш мақсадида 1 октябирдан 16 та махсус техника ва 64 нафар ходимлардан иборат 16 та бригада фаолият юритади.
Шунингдек, жорий мавсумда жами 6 минг 824 тонна суюлтирилган газ етказиб берилади. Суюлтирилган газ таъминоти тизимини яхшилаш мақсадида газ тўлдириш иншоотларига 9 та замонавий электрон сатҳ ўлчагич, 3 та автотарози, 2 та насос, 2 та компрессор, 10 та газ тўлдириш тарозиси ўрнатилди.
Суюлтирилган газ таъминотини рақамлаштириш учун истеъмолчиларга 240 624 дона ID-карталар тарқатилди ҳамда 576 минг 614 та маиший газ баллонларига стикерлар ўрнатилди.
Маълумот учун: жорий йилда газ тўлдириш иншоотларига қўшимча равишда 2 та насос, 2 та компрессор, 12 та газ тўлдириш тарозиси (колонка) ва 4 дона сиғимлар ўрнатилади ҳамда 449 628 дона ID-карталар ва 576 614 дона маиший газ баллонларига (электрон чип) стикерлар ўрнатилади.
Энергетика вазирлиги Ишчи гуруҳи томонидан ҳудудлар бўйлаб ўрганиш ишлари давом этмоқда.
Ўзбекистон Республикаси
Энергетика вазирлиги Матбуот хизмати
757
