Бугун, 1 июнь куни АОКАда "Ўзбекгидроэнерго" АЖ ахборот хизмати раҳбари Равшан Бойқулов иштирокида брифинг бўлиб ўтди.
Брифингда инвестиция лойиҳаларининг бажарилиши: эришилган натижалар ва амалга оширилаётган лойиҳалар ҳақида маълумот берилди.
Қайд этилишича, 2021 йилда Тошкент вилоятида Чирчиқ Бўзсув трактида жойлашган янги Камолот ГЭСи, Сурхондарё вилоятида жойлашган Зарчоб-2 кичик ГЭСи янгитдан қуриб битказилиши ҳамда Сирдарё вилоятида жойлашган йирик Фарҳод ГЭСни модернизация қилиш ишлари амалга оширилиб, фойдаланишга топширилиши режалаштирилган.
Чирчиқ-Бўзсув трактида жойлашган янги Камолот ГЭСнинг ўрнатилган қуввати 8,2 МВт бўлиб, жорий йилнинг октябрь ойида фойдаланишга топширилиши;
Сурхондарё вилоятида жойлашган янги Зарчоб-2 кичик ГЭСнинг умумий қуввати 38.2 МВт бўлиб, мазкур кичик ГЭС август ойида фойдаланишга топширилиши;
Фарҳод ГЭСни модернизация қилиш ишлари жорий йилнинг декабрь ойида якунланиб, фойдаланишга топширилиши режалаштирилмоқда. Модернизациядан сўнг, Фарҳод ГЭСнинг умумий қуввати 127 МВтга етказилади.
Жорий йилда жами 173 МВтга тенг гидроэнергетик қувват фойдаланишга топширилади.
Яна бир муҳим жиҳат, Жамият томонидан амалга оширилаётган кенг кўламли ва самарали фаолият натижаси ўлароқ, республикамизда ишлаб чиқарувчи корхоналар орасида биринчилардан бўлиб, “кучли тўртликка” кирувчи “Fitch Ratings” халқаро кредит рейтинги қўлга киритилди. Бу эса, кенг кўламли инвестицияларни, хорижий кредитларни тўғридан-тўғри жалб этишда Жамиятимизни янги даражага кўтаришга хизмат қилади.
Таъкидлаш жоизки, Жамият томонидан нафақат экологик жиҳатдан тоза, арзон ва қайта тикланувчи электр энергия ишлаб чиқариш фаолияти, балки, маҳаллийлаштириш, саноатда кооперация алоқаларини кенгайтириш, импорт ва экспорт амалиётлари ҳамда ахборот коммуникация технологияларини ривожлантиришга доир фаолиятда ҳам ижобий натижаларга эришилмоқда.
501
