“Ўзэнергоинспекция” Сирдарё ҳудудий бўлими томонидан 2021-2022 йилларда ижтимоий соҳа объектларини куз-қиш мавсумига тайёрлаш ишларини қай тарзда олиб борилаётганлиги ўрганилди.
Сирдарё вилоятида жами 648 та ижтимоий соҳа объектлари мавжуд бўлиб шундан 195 таси Мактабгача таълим бошқармаси, 121 таси Соғлиқни сақлаш муассасалари, 309 таси Халқ таълими бошқармаси, 23 таси касбий таълимни ривожлантириш ва мувофиқлаштириш ҳудудий бошқармасига қарашли муассасалар ҳисобланади.
“Ўзэнергоинспекция” Сирдарё ҳудудий бўлими томонидан 245 та (яъни 38 фоизи) ижтимоий соҳа объектларининг электр қурилмалари, иссиқлик тармоқлари, корхона томонидан режалаштирилган мукаммал ва жорий таъмирлаш ишларини ҳамда кўмир сақлаш омборларини техник ҳолати жойларга чиқиб ўрганишлар ўтказилганда 23 та муассасада ўрганиш давомида бир қатор камчиликлар аниқланди.
Хусусан, Мирзаобод туманидаги 13-сонли оилавий поликлиника 0,4 кВ бош тақсимлаш қурилмасида ПН-04 кВ сақлагичлари йўқлиги, чанг ва исдан тозаланмаганлиги, тақсимлаш қурилмасига огоҳлантириш белгилари осилмаганлиги, жавобгар шахс тайинланмаганлиги, иситиш қозонини мўриконлари яроқсиз ҳолдалиги, бинодан ташқарига чиқарилмаганлиги ва манометр ускуналари ўрнатилмаганлиги маълум бўлди.
Халқ таълими бошқармасига қарашли Мирзаобод туманидаги 7-сонли умумтаълим мактаби электр хўжалигига жавобгар шахс тайинланмаган, 0,4 кВ бош тақсимлаш шитига огоҳлантирувчи белгилар ўрнатилмаган, тақсимлаш қурилмасидаги симлар учликларсиз бурама усулда уланган, 0,4 кВ бош тақсимлаш қурилмаси бир чизиқли схемаси чизилмаган, қозонхона том қисмидан сув ўтиш ҳолатлари мавжуд. Шунингдек, иситиш қозонлари мўриконлари чириган, иситиш қозонларини босим ўлчаш манометрлар ўрнатилмаган, кўмир сақлаш омбори чиқиндилардан тозаланмаган ва ёнғинга қарши ўт ўчириш химоя воситалари билан таъминланмаган. Туманидаги 2-сонли умумтаълим мактабида ҳам худди шу каби ҳолатларни учратиш мумкин.
Юқоридаги ҳолатлар юзасидан “Ўзэнергоинспекция” Сирдарё ҳудудий бўлими томонидан мутасадди ташкилотларга аниқланган камчиликларни бартараф этиш юзасидан кўрсатмалар чиқарилиб бажарилиши назоратга олинди. Ҳудудлардаги ижтимоий соҳа объектларини ўрганиш давом этмоқда.
“Ўзэнергоинспекция” Матбуот хизмати
699
