Жорий йилнинг 9 октябрь куни Энергетика вазирлигида вазирнинг биринчи ўринбосари Жўрабек Мирзамаҳмудов Франциянинг Ўзбекистондаги янги элчиси Изабель Сервоз-Галлуччини қабул қилди.
Томонлар ўртасидаги музокара давомида француз компаниялари, шунингдек энергетика соҳасидаги истиқболли лойиҳалар бўйича икки томонлама ҳамкорликни ривожлантириш масалалари муҳокама этилди.
Франция элчисига мамлакатимиз энергетика соҳасида амалга оширилаётган ислоҳотлар, жумладан «Қайта тикланувчи энергия манбаларидан фойдаланиш тўғрисида»ги (ЎзРҚ 539, 2019 йил 21 май) қонун ҳамда Ўзбекистон Республикаси Президентининг «Иқтисодиёт тармоқлари ва ижтимоий соҳада энергия самарадорлигини ошириш, энергия тежовчи технологиялар ва қайта тикланувчи энергия манбаларини жорий этишни жадаллаштириш чоралари тўғрисида»ги қарори (№ПҚ-4422, 2019 йил 22 август) ҳақида маълумотлар берилди.
Учрашувда Ўзбекистон делегациясининг яқинда Францияга ташрифи давомида эришилган келишувларни амалга ошириш, хусусан энергетика соҳасини ислоҳ қилишда француз компаниялари тажрибасидан фойдаланиш, халқаро экспертларни жалб этиш масалалари ҳам муҳокама этилди.
Шунингдек, нефть-газ соҳасида Total (Франция) ва Mubadala (БАА) компаниялари иштирокидаги истиқболли лойиҳаларни амалга оширишни, жумладан истиқболли ҳудудларда геология қидирув ишлари ўтказишни жадаллаштириш масалалари муҳокама этилди.
Франция томони мамлакатимиз энергетика соҳасида амалга оширилаётган кенг кўламли ислоҳотлар уларда катта қизиқиш уйғотаётганини, бу йўналишдаги ўзаро ишлар давом эттирилиши ва келгусида ҳамкорлик алоқалари янада ривожланишидан манфаатдор эканлигини билдирди.
Ўзбекистон Республикаси
Энергетика вазирлиги матбуот хизмати
1054
