Президентимиз Шавкат Мирзиёев бошчилигидаги расмий делегация билан Тожикистон Республикасидаги олий даражадаги музокаралар давомида Ўзбекистон билан Тожикистон ўртасидаги дўстлик, яхши қўшничилик ва стратегик шериклик муносабатларини янада мустаҳкамлашнинг долзарб масалалари, жумладан энергетика соҳасида ҳамкорликни ривожлантириш масалалари ҳам муҳокама қилинмоқда.
Хусусан, мазкур ташриф доирасида Зарафшон дарёси ҳавзасида гидроэлектр станцияларини қуриш ва улардан фойдаланишни техник-иқтисодий баҳолаш ҳамда томонлар иштирокида акциядорлик жамияти кўринишида қўшма корхонани ташкил этиш бўйича Ўзбекистон Республикаси Ҳукумати ва Тожикистон Республикаси Ҳукумати ўртасидаги Битим имзоланди.
Мазкур битимга асосан Тожикистон Республикасининг Зарафшон дарёси ҳавзасида гидроэлектр станцияларнинг қурилиши икки босқичда амалга оширилади.
Биринчи босқичда, йилига ўртача 800 миллион киловатт соат электр энергияси ишлаб чиқарувчи, қуввати 140 мегаваттга ва прогноз қиймати 282 миллион АҚШ долларига тенг Ёвон гидроэлектр станциясини қуриш ишлари бажарилади.
Иккинчи босқичда, йилига ўртача 600 миллион киловатт соат электр энергияси ишлаб чиқарувчи, қуввати 135 мегаваттга ва прогноз қиймати 270 миллион АҚШ долларига тенг Фандарё гидроэлектр станциясини қуриш имконияти ўрганиб чиқилади.
Лойиҳанинг буюрмачиси этиб, томонлар иштирокида ташкил этиладиган акциядорлик жамияти белгиланади.
Лойиҳа халқаро молия ташкилотларининг қарз ва грант маблағлари ҳамда таъсис қилинадиган қўшма корхона устав жамғармасига киритиладиган томонларнинг ўз маблағлари ҳисобига молиялаштирилади.
Имзоланган Битим инвестиция лойиҳасини ўрганиш ва тайёрлаш ҳамда мазкур тадбирларни амалга ошириш учун қўшма корхона ташкил қилиш босқичлари ва механизмини белгилайди.
Шунингдек, инвестиция лойиҳасини амалга ошириш бўйича аниқ чора-тадбирлар режаси ва “йўл хариталари”ни ишлаб чиқиш ва ҳаётга татбиқ этиш учун асос бўлади.
Шуни ҳам таъкидлаш жоизки, қуриладиган гидроэлектр станциялар Ўзбекистон Республикаси эҳтиёжлари учун 1 миллиард 400 миллион киловатт соат экологик тоза электр энергиясини ишлаб чиқаради.
Бундан ташқари, гидроэлектр станцияларни қуриш ва ундан фойдаланиш даврида қўшимча янги иш ўринлари яратилиб, Ўзбекистон ва Тожикистоннинг бошқа минтақаларига паритетлик асосида электр энергияси оқимини таъминлайди.
Биз ишонч билан айта оламизки, ҳозирда Тожикистон Республикасида бўлиб ўтаётган Олий даражадаги ташриф Ўзбекистон ва Тожикистон энергетика тармоқлари ривожланишида янги тарихни бошлаб берди ва бу икки давлат халқининг фаровон ҳаётига хизмат қилади.
Ўзбекистон Республикаси
Энергетика вазирлиги Матбуот хизмати
1320
