2021 йилнинг 24 июнь куни Иқтисодий ҳамкорлик ташкилотига (ИҲТ) аъзо давлатлар энергетика вазирларининг 4-йиғилиши онлайн тарзда бўлиб ўтди.
Ушбу минтақавий иқтисодий ташкилот 1985 йилда ташкил этилган бўлиб, Афғонистон, Озарбайжон, Эрон Ислом Республикаси, Қозоғистон, Қирғизистон, Покистон, Тожикистон, Туркия, Туркманистон ва Ўзбекистон ушбу ташкилотнинг иштирокчилари ҳисобланади.
Ўзбекистон Республикаси Президенти Шавкат Мирзиёев 2021 йилнинг март ойида бўлиб ўтган 14- ИҲТ Саммитида Иқтисодий ҳамкорлик ташкилоти ҳудуди – бу тарихи, дини, маданияти ва қадриятлари муштарак, улкан имкониятларга эга бўлган умумий минтақа эканлигини таъкидлади. Шунингдек, Саммитда Давлатимиз раҳбари 2025 йилгача қабул қилинган ҳаракат дастури доирасида кўп томонлама шерикликни ривожлантириш мақсадида бир қатор муҳим ташаббусларни илгари сурди.
Хусусан, энергетика соҳасида Шавкат Мирзиёев қайта тикланадиган ва муқобил энергия манбаларига бой минтақамизда “яшил иқтисодиёт”ни ривожлантириш имкониятлари ниҳоятда катта эканлигини таъкидлаб, энергетика барқарорлигини таъминлаш, соҳага инвестиция ва замонавий технологияларни кенг жалб этишга қаратилган Ўрта муддатли Стратегияни ишлаб чиқиш ва тасдиқлашни таклиф этди.
Озарбайжон томони раислигида бўлиб ўтган Иқтисодий ҳамкорлик ташкилотига аъзо давлатлар энергетика вазирларининг июнь ойидаги йиғилиши ушбу ва бошқа ташаббусларни амалга оширишга бағишланган.
Ўзбекистон Энергетика вазири ўринбосари Шерзод Ходжаев иштирокчиларга 2030 йилга бориб мамлакатимизда энергетика соҳасини ислоҳ қилишнинг ҳозирги босқичи, Энергетика вазирлиги томонидан ишлаб чиқилиши ва электр энергиясини сезиларли даражада икки баробар оширишни назарда тутувчи Концепциянинг қабул қилиниши ҳақида маълумот берди. Шунингдек, Ўзбекистонда электр энергияси бозорига ўтиш учун қўйилган дастлабги қадамлар ҳам тақдим этилди.
“Энергетика соҳасидаги давлат муносабатларининг кескин камайиши билан бозор муносабатларига ўтиш – электр энергетика соҳасининг бошқариш тизимини такомиллаштиришга хизмат қилади. Натижада мамлакатнинг энергия хавфсизлиги, республика энергия таъминотининг ишончлилиги ва барқарорлиги таъминланади”, – деди Ш.Ходжаев.
Иқтисодий ҳамкорлик ташкилотига аъзо мамлакатлар эенергетика бошқармалари раҳбарлари иштирокида бўлиб ўтган учрашувда қуйидаги ҳужжатлар муҳокама қилинди ва қабул қилинди: тоза энергия маркази Низоми, ИҲТга аъзо мамлакатлар учун 2021-2022 йилларга мўлжалланган минтақавий электр энергияси бозори лойиҳасини амалга ошириш “йЙл харитаси”; Энергетика соҳасидаги ҳамкорлик тўғрисида Боку Декларацияси.
Йиғилиш якунларига кўра, иштирокчилар яқин келажакда ИҲТ мамлакатлари энергетика вазирларининг 2022 йилнинг иккинчи ярми ёки 2023 йилнинг биринчи ярмида ўтказилиши режалаштирилган 5-йиғилиши санаси ва ўтказилиш жойини аниқлашга келишиб олдилар.
Ўзбекистон Республикаси
Энергетика вазирлиги Матбуот хизмати
919
