2021 йилнинг 17 июль куни Ўзбекистон Республикаси Энергетика вазири Алишер Султанов Халқаро Энергетика хартияси Бош котиби Урбан Руснак билан музокаралар ўтказди.
Учрашувда Энергетика хартияси раҳбари жорий йилнинг 15-16 июль кунлари Тошкент шаҳрида бўлиб ўтган “Марказий ва Жанубий Осиё: минтақавий ўзаро боғлиқлик: Таҳдидлар ва имкониятлар” мавзусидаги халқаро конференция тадбирларини юқори баҳолади.
У.Руснакнинг таъкидлашича, Ўзбекистон энергетика тармоғини ислоҳ қилишнинг таҳлили шуни кўрсатадики, мамлакат бу йўналишда ижобий суръатларда ҳаракат қилмоқда. Хусусан, энг яхши халқаро тажрибани ўрганиш ва мослаштириш, қабул қилинган ҳужжатларда белгиланган муддатлар ва мажбуриятларни ўз вақтида бажариш, энергия ускуналарини янгилаш, ишлаб чиқариш қувватларини янада ошириш, энергия самарадорлигини ошириш борасида дадил қадам ташламоқда.
Учрашув давомида Энергетика вазирлиги томонидан мамлакатда амалга оширилаётган энергия самарадорлигини ошириш бўйича чора-тадбирларнинг ҳолати ва истиқболлари тўғрисида ҳисобот ҳужжатларини тайёрлашга кўмаклашувчи халқаро тажрибага асосланган энергия самарадорлиги тўғрисидаги Низомнинг тавсиялари муҳокама қилинди.
Энергетика хартияси ушбу кенг кўламли жараённинг дастлабки босқичларидан бошлаб Ўзбекистон энергетика соҳасини ислоҳ қилиш жараёнини қўллаб-қувватлаган ҳолда доимо меъёрий ҳужжатларни ишлаб чиқишда амалий тажриба алмашиш, зарур экспертлар ва мутахассисларни жалб қилган.
2007 йилдан бошлаб Энергетика хартиясида Марказий ва Жанубий Осиёда йилига 1-2 марта йиғиладиган минтақавий энергетика ҳамкорлиги бўйича ишчи гуруҳи тузилган.
2020 йилнинг 2 ноябрь куни Ўзбекистон Республикаси Энергетика вазирлиги мезбонлигида мазкур Энергетика хартияси Ишчи гуруҳининг 16-йиғилиши онлайн тарзда бўлиб ўтди.
2020 йилги форумда миллий энергетика агентликлари ва вазирликлари, шунингдек Марказий Осиёнинг бешта давлати, Афғонистон, Монголия ва МДҲ Энергетика Кенгашидан электр энергиясини ишлаб чиқариш, узатиш ва тақсимлаш компаниялари вакилларидан иборат 30 та иштирокчи иштирок этди.
Ўзбекистон Республикаси
Энергетика вазирлиги Матбуот хизмати
178
