Ўзбекистон Энергетика вазирлиги томонидан “ЛУКОЙЛ” билан ҳамкорликда ўтказилган “Save Energy – 2021” танлови ғолиблари тақдирланди. Танлов энергияни тежаш ва энергия самарадорлигини ошириш мавзусини оммалаштиришга қаратилган эди. Унда учта номинация бўйича жами 50дан ортиқ ишлар тақдим этилди.
Кўплаб қизиқарли ишларни ҳисобга олган ҳолда, иштирокчиларни қуллаб-қувватлар ва рағбатлантириш мақсадида танлов ҳакамлар ҳайъати совринларни тақсимлашда ҳар бир номинация бўйича иккита ғолибни тақдирлашга қарор қилди.
Хусусан, “Энг яхши видеоролик” номинациясида Авлиёқулова Нафиса ва Исмоилов Шоҳжаҳонларнинг истеъдодли асарлари ажралиб турди. Уларга ҳар бири 10 000 000 сўмлик бўлган сертификатлар топширилди.
“Энг яхши ижтимоий баннер” номинациясида Солиев Муслимбек ва Худойқулов Анварлар ғолиб бўлишди ва уларнинг ҳар бирига 7 500 000 сўмлик сертификатлар топширилди.
“Энг яхши мақола” номинациясида Владимир Чернолуцкий ва журналист Ирода Тошматова ғолиб деб топилиб, уларнинг ҳар бирига 5 000 000 сўмлик сертификатлар топширилди.
Эслатиб ўтамиз, ғолибларни танлашнинг асосий мезонлари матбуот ва ижтимоий тармоқларда энергияни тежаш ва энергия самарадорлигини ошириш мавзусининг ёритилиши, ўзига хослиги ва холислиги эди.
Танлов жамоатчилик, хусусан, ёшларнинг эътиборини табиий ресурсларнинг сақланишини таъминлаш ва аҳолини энергия ресурсларидан фойдаланишда самарали ва тежамли муносабатда бўлишни рағбатлантириш масалаларига қаратилди.
Мусобақанинг бош ҳомийси “ЛУКОЙЛ Узбекистан Оперейтинг Компани” МЧЖ бўлди.
Ўзбекистон Республикаси
Энергетика вазирлиги Матбуот хизмати
929
