Истеъмолчиларни электр энергияси, табиий ва суюлтирилган газ билан таъминлаш сифатини ошириш мақсадида олиб борилаётган модернизация ва реконструкция ишлари: 30 июль куни амалга оширилган ишлар — айрим ҳудудлар мисолида.
Сурхондарё вилояти:
Сариосиё туманида жами 12 973 та табиий газ истеъмолчилари мавжуд бўлиб, шулардан 2 414 тасини кўп қаватли, 10 559 тасини эса ерли аҳоли хонадонлари ташкил этади. Бугунги кунгача 4 673 та ерли аҳоли хонадонларига электрон газ ҳисоблагичларни ўрнатиш ишлари якунланди. Уларнинг барчаси “BillingGaz” дастурига уланган. Бу борадаги ишлар вилоят бўйлаб давом этмоқда.
Ушбу ўрнатилаётган “ақлли” газ ҳисоблагичларни, истеъмолчилар учун бир қанча афзалликларга эга. Жумладан, табиий газ назорати ва тўловларни амалга ошириш шахсан истеъмолчининг ўз назоратида бўлади. Бу жараёнда ҳеч қандай газ ходими томонидан аралашув бўлмайди. Шунингдек, тўловларни амалга оширишда истеъмолчи уйда ўтирган ҳолда, “Click”, “Payme”, “Upay”, “Paynet” ва “Oson” каби электрон тўлов иловаларидан фойдаланиши мумкин.
Шу кунгача Сурхондарё вилояти бўйича аҳоли истеъмолчиларига жами 57 930та, замонавий ҳисоблагичлар ўрнатилди.
Жорий йилнинг олти ойи давомида “Қизириқ” газ тўлдириш иншооти томонидан вилоятнинг Қизириқ, Ангор, Шерабод ва Бандихон туманларида истиқомат қилувчи аҳоли хонадонларига 4210.4 тонна суюлтирилган газ ҳажмлари етказиб берилди. Шунингдек, 2021 йил июль ойи учун 974,8 тонна суюлтирилган газ етказиб бериш режалаштирилган бўлиб, амалда ойнинг ўтган 29 куни давомида 839 тонна ёки 41 948 дона суюлтирилган газ баллонлари ўз эгаларига етказиб берилди ва даврий режа 99,7 фоизга бажарилди.
Тошкент вилояти:
Бекобод шаҳридаги аҳоли гавжум масканлар, кўп қаватли уйлар ва туман марказий шифохонасида туман Фавқулодда вазиятлар бўлими билан ҳамкорликда ис газидан заҳарланишни олдини олиш, газдан тўғри ва оқилона фойдаланиш, газ-ҳаво аралашмаси чақнашини олдини олиш ва куз-қиш мавсумига тайёргарлик кўриш бўйича тарғибот ишлари олиб борилмоқда.
Бўстонлиқ тумани худудида подстанция ва трансформаторларни таъмирлаш ишлари олиб борилмоқда.
Бухоро вилояти:
Бухоро шаҳар электр таъминоти корхонаси ходимлари томонидан шаҳарнинг “Ширбудин” МФЙ, “Маърифат” кўчасига қўшимча равишда куввати 400 кВА бўлган янги трансформатор пункти ўрнатилиб, монтаж ишлари амалга оширилди.
Шунингдек, 12 дона мустаҳкам темир-бетон таянчлар қурилди ва 500 метр узунликдаги электр узатиш тармоқлари янгиланиб, замонавий СИП кабеллари тортилди.
Наманган вилояти:
Наманган вилоятида “Обод қишлоқ” ва “Обод маҳалла” дастурларига асосан, умумий 67,9 км узунликда паст кучланишли электр узатиш тармоқлари янгидан қурилди, 28 дона янги трансформатор пунктлари ўрнатилди ҳамда 67,3 км узунликда паст кучланишли электр узатиш тармоқлари ва 33 дона трансформатор пунктлари мукаммал таъмирланди.
Самарқанд вилояти:
Самарқанд тумани “Қўштамғали” маҳалласида 14 та темир-бетон таянчлар ўрнатилди. Шунингдек, аҳолига етказиб берилаётган электр энергияси сифатини яхшилаш мақсадида 1361-сонли рақамли трансформатор пунктига қўшимча сифатида 160 кВА кучланишли электр ускуна ўрнатилди ҳамда 400 метр электр узатиш тармоғи тортилди.
Маҳаллада яна 800 метр паст кучланишли электр узатиш тармоғини янгилаш режалаштирилган.
499
