Ҳурматли истеъмолчилар!
Бугун, жорий йилда истеъмолчиларни ёқилғи-энергия ресурслари билан таъминлаш борасида амалга оширилаётган, ўз навбатида энергетика соҳасида Ўзбекистон тарихидаги 10 та энг йирик лойиҳалар хусусида қисқача маълумот бериб ўтамиз.
Биринчи лойиҳа: 2021 йилнинг ўтган 6 ойи давомида электр энергетика соҳасида 4 минг 341 мегаваттга тенг бўлган иссиқлик, қуёш ва шамол электр станцияларини қуриш бўйича инвесторлар билан жами 10 та шартнома имзоланди. Мазкур 4 минг 341 мегаватт ҳажм Ўзбекистонда амалдаги ўрнатилган қувватларнинг қарийб учдан бирини ташкил қилади.
Иккинчи лойиҳа: Жорий йилда Навоий ва Самарқанд вилоятларида ҳар бирининг қуввати 100 мегаваттдан бўлган 2 та қуёш фотоэлектр станцияси ишга туширилади. Ушбу станциялар – Ўзбекистон тарихида биринчи йирик ҳажмдаги қуёш фотоэлектр станциялари ҳисобланади.
Учинчи лойиҳа: 2021 йил якунига қадар умумий қуввати 1 минг 800 мегаваттга тенг бўлган иссиқлик ва қуёш электр станциялари ишга туширилади. Бир йилда бу каби йирик ҳажмдаги қувватлар аввал ишга туширилмаган.
Тўрттинчи лойиҳа: 2021 йилда юқори кучланишли 17 та подстанцияда қўшимча 1 минг 568 мегавольт ампер (МВА) қувват оширилади. Шунингдек, магистрал электр тармоқларида 3 та йирик инвестиция лойиҳаси (“Ўзбекистон ҳудудида жойлашган 500 кВли “Ғузор–Регар” (Л-507) юқори кучланишли электр узатиш тармоғини тиклаш” инвестиция лойиҳаси;
- “500 кВ Сурхон–Пули-Хумри (Хўжа-Алвон) электр тармоғини қуриш лойиҳаси доирасида 500 кВли “Сурхон” подстанциясидаги очиқ тақсимловчи қурилма (ОТҚ)ни кенгайтириш” инвестиция лойиҳаси;
- “Поп–Наманган–Андижон электрлаштирилган темирйўл линиясининг ташқи объектларини электр таъминоти билан таъминлашда таянч нимстанциясини қуриш” инвестиция лойиҳаси.) ишга туширилади. Бир йилда магистрал электр тармоқларида бу ҳажмдаги қувват ва лойиҳалар аввал ишга туширилмаган.
Бешинчи лойиҳа: 2021 йил давомида узунлиги 15 000 километр бўлган паст кучланишли электр узатиш тармоқлари янгидан қурилади ва реконструкция қилинади. Бу Ўзбекистон тарихида паст кучланишли тармоқларда илк бор йирик ҳажмдаги янгилаш ишлари ҳисобланади.
Олтинчи лойиҳа: 2021 йилда 4 000 та трансформатор пункти модернизация ва реконстркция қилинади. Бу ҳам Ўзбекистон тарихида трансформатор пунктларидаги илк бор йирик ҳажмдаги янгилаш ишлари ҳисобланади.
Еттинчи лойиҳа: Жорий йилда Қашқадарё вилоятида Мустақил Давлатлар Ҳамдўстлиги (МДҲ) давлатларида ягона ва энг йирик лойиҳа ҳисобланадиган “Uzbekistan GTL” заводи ишга туширилади.
Саккизинчи лойиҳа: 2021 йилда электр энергиясини ҳисобга олиш ва назорат қилишнинг автоматлаштирилган тизими (АСКУЭ) доирасида барча – 7 миллион 300 мингдан ортиқ истеъмолчига замонавий электр ҳисоблагичлар бепул ўрнатиб берилди.
Тўққизинчи лойиҳа: 2021 йилда табиий газни ҳисобга олиш ва назорат қилишнинг автоматлаштирилган тизимини жорий қилиш (АСКУГ) доирасида барча 3 миллион 500 мингдан зиёд истеъмолчига замонавий электрон газ ҳисоблагичлар бепул ўрнатиб берилади.
Ўнинчи лойиҳа: 2021 йилда Республика ҳудудлари бўйлаб маиший газ баллонларга штрих кодли стикерларни ўрнатиш ишлари якунланади. Энди суюлтирилган газ баллонлари ҳам онлайн назорат қилинади.
1302
