Европадаги «New Europe» ахборот порталида Ўзбекистонда қайта тикланувчи энергияни ривожлантириш бўйича амалга оширилаётган ишларга бағишланган мақола чоп этилди, деб хабар бермоқда «Дунё» АА мухбири.
Материалда таъкидланганидек, Ўзбекистон энергетика вазирлиги 10 август куни мамлакатда электр энергиясини ишлаб чиқаришнинг катта қисми қайта тикланувчи қуёш, шамол манбаларидан олишни режалаштираётганини маълум қилган.
Ахборот портали Ўзбекистон энергетика вазири Алишер Султоновнинг «Биз энергетика вазирлигида мавжуд инфратузилманинг самарадорлигини ошириш учун астойдил ҳаракат қилаяпмиз ва доимий равишда аҳоли ҳамда мамлакатнинг ўсиб бораётган тармоқларига узлуксиз электр таъминотини таъминлаш имкониятларини излаяпмиз”, деган сўзларини келтирган.
Ўзбекистон энергетика вазирлиги, Инвестициялар ва ташқи савдо вазирлиги, Давлат-хусусий шерикликни ривожлантириш агентлиги, Жаҳон банки, Халқаро молия корпорацияси, Осиё тараққиёт банки ва Европа тикланиш ва тараққиёт банки билан ҳамкорликда қуёш фотоэлектр станциялар, шамол, газ двигателлари ва газ турбинаси станцияларини қуриш учун турли халқаро энергия ишлаб чиқарувчилари билан 16 та ҳамкорлик шартномаларини имзолади.
“2020 йилда COVID-19 сабабли иқтисодий ривожланишнинг секинлашишига қарамай, электр энергиясига бўлган талаб ўсишда давом этмоқда, - дейилади мақолада. - Энергетика вазирлиги Ўзбекистон энергетика тузилмасида қайта тикланадиган энергия манбаларининг улушини ошириб, 2030 йилга мўлжалланган мақсадларни қайта кўриб чиқишга қарор қилди. Қуёш фотоэлектр станция тизимлари учун сўнгги тендерларда рақобат жараёни натижасида олинган таклифлар Энергетика вазирлигига келажак учун умид бағишлади. Хулосаларга кўра, қуёш фотоэлектр станциялари қувватини 5 ГВт дан 7 ГВт гача, шамол энергияси станциялари кучини эса 3 ГВт дан 5 ГВ гача ошириш мумкин.
Ўзбекистон энергетика вазирлигига кўра, янгиланган Концепция келгуси йил бошида эълон қилинади”.
755
