Фарғона нефтни қайта ишлаш заводида (ФНҚИЗ) API стандарти асосида I-гуруҳга мансуб янги турдаги мотор, гидравлик ва трансмиссион мойларини ишлаб чиқарилиши йўлга қўйилади.
Бугунги кунга келиб бундай маҳсулотларнинг ишлаб чиқилган пилот партиялари саноат шароитида истеъмол объектларида муваффақиятли синовдан ўтказилиб, яқин кунларда янги мойлар учун мувофиқлик сертификатлари олиниб, маҳсулот ишлаб чиқарилиши йўлга қўйилади.
“Фарғона НҚИЗ” МЧЖда янги турдаги мойлар ишлаб чиқаришни ривожлантириш дастури доирасида модернизация ва реконструкция ишларини амалга ошириш, бу борадаги олиб борилаётган кенг кўламли ишларнинг бир қисми ҳисобланади.
Бу ерда Ўзбекистоннинг энг истиқболли корхоналарида бўлгани каби маҳаллий маҳсулотларни ишлаб чиқаришда халқаро стандартлар ва техник регламентларни фаол жорий этишга, уларнинг замон талабларига мувофиқлигини таъминлашга алоҳида эътибор қаратилмоқда.
Заводда ишлаб чиқарилаётган мотор ёнилғиларини “Евро 5” ҳамда сурков мойларини II+/III гуруҳига мансуб API жаҳон стандартлари талаблари даражасига етказиш мақсадида, янги қурилмаларни қуришни ва мавжуд қурилмаларнинг реконструкцияси қилишни кўзда тутган модернизация лойиҳаси доирасида, дунёнинг етакчи лойиҳа институтлари ва компаниялари билан ҳамкорликда ишлаб чиқилган лойиҳалари асосида инвестицион лойиҳанинг техник-иқтисодий асоси (ТИА) ишлаб чиқилган бўлиб, ўрнатилган тартибда экпертизадан ўтказилиб келишилган, ҳозирда Вазирлар Маҳкамасига тасдиқлаш учун киритилган.
Шу билан бирга, модернизация жараёнининг бир қисми сифатида ишчи лойиҳаларни тайёрлаш, зарур жиҳоз ва материалларни аниқлаш, зарур тайёргарлик ишларини амалга ошириш ишлари давом этмоқда.
Хусусан, “ЎЗРОСНЕФТЕГАЗГЕО” МЧЖ билан ҳамкорликда қурилиш объектларида қидирув-мухандислик тадқиқотлари ўтказилмоқда; “Омскнефтехимпроект” МЧЖ (Россия Федерацияси) ва “UzLiTi Engineering” МЧЖ томонидан янги ва мавжуд технологик қурилмаларни реконструкция қилиш учун ишчи лойиҳалар ишлаб чиқилмоқда; заводнинг узлуксиз ишлашини таъминлаш ва газ конденсатига бўлган эҳтиёжни камайтириш учун водород ишлаб чиқариш қурилмаси қурилишини жадаллаштириш чоралари кўрилмоқда.
Шунингдек, таниқли Америка ва Италия компаниялари билан водород ишлаб чиқариш қурилмаси учун асбоб-ускуналар ишлаб чиқариш ва етказиб бериш бўйича тузилган шартномаларни молиялаштириш билан боғлиқ жараён, масалан, печь, адсорберлар ва бошқа жиҳозларни етказиб бериш; Италиянинг “MACCHI” компанияси томонидан ишлаб чиқарилаётган буғ қозонларини қурилиши ва монтаж ишларига тайёргарлик кўриш бўйича ишлар давом этмоқда.
ФНҚИЗда ишлаб чиқариш жараёнларини режалаштириш ишларини оптималлаштириш бўйича замонавий дастурларни амалга ошириш мақсадида “Aspen Technology Services Corporation” корпорацияси билан музокаралар олиб борилмоқда.
Ўзбекистон Республикаси
Энергетика вазирлиги Матбуот хизмати
731
