Bugun, 8 sentyabr kuni “Hududiy elektr tarmoqlari” AJning “Elektr energiyasini hisobga olishni avtomatlashtirish markazi”da “O‘zbekiston iqtisodiyoti tarmoqlarini raqamlashtirish sharoitida elektr tarmoqlari korxonalarini innovatsion rivojlantirish” mavzusida xalqaro ilmiy-amaliy konferensiya o‘tkazildi.
O‘zbekiston Respublikasi Innovatsion rivojlanish vazirligi, Islom Karimov nomidagi Toshkent davlat texnika universiteti hamda “Hududiy elektr tarmoqlari” AJ hamkorligida tashkil etilgan tadbirda Gruziya, Koreya, Rossiya va Germaniya davlatlarining soha ekspertlari, energetika kompaniyalari vakillari hamda olimlar, ilmiy va amaliy xodimlar, yosh olimlar, doktorantlar va bakalavriyat darajasida tahsil olayotgan hamda ilmiy izlanishda bo‘lgan talabalar ishtirok etdi.
Konferensiyadan ko‘zlangan asosiy maqsad elektr energetika sohasini innovatsion rivojlantirish hamda raqamlashtirish sharoitida xalqaro ilmiy ishlanmalar, g‘oya va fikrlar almashish, shuningdek, elektr uzatish tarmoqlari hamda energiya samaradorligini oshirishda dunyo innovasion texnologiyalarni joriy etishning tahlilini olib borishdan iboratdir.
Ma’lumki mamlakatimizda energetika sohasini raqamlashtirish, xususan sohaga innovatsion texnologiyalarni joriy etishda qator ishlar amalga oshirilmoqda. Xususan, O‘zbekiston Respublikasi Prezidentining 2018 yil 23 oktyabrdagi “Elektr energetikasi tarmog‘ini jadal rivojlantirish va moliyaviy barqarorligini ta’minlash chora-tadbirlari to‘g‘risida” 3981-sonli qarori asosida “Hududiy elektr tarmoqlari” AJ tomonidan bugungi kunda respublika elektr energiyasi iste’molchilariga ASKUE tizimiga mos keluvchi hisoblagichlarni o‘rnatish ishlari amalga oshirildi.
Aytish kerakki, ASKUE tizimini joriy etishdan asosiy maqsad iste’molchi va ta’minotchi o‘rtasidagi shaffoflikni ta’minlash, yetkazib berilgan elektr energiyasi uchun hisob-kitoblarga aniqlik kiritish, shu bilan birga, iste’molchilarning foydalangan elektr energiyasi uchun to‘lov intizomini mustahkamlash, elektr energiyasini taqsimlashda har bir iste’molchi va transformator punkti kesimida kerakli ma’lumotlarni olish va tahlil qilib borish, shu bilan birga, ushbu olingan ma’lumotlar asosida tarmoqlarda modernizasiya ishlarini aniq amalga oshirib borish hisoblanadi.
Ta’kidlash joizki, tizim to‘liq joriy etilishi natijasida elektr energiyasi ta’minotida sezilarli o‘zgarishlar bo‘ladi. Avvalo, tizimdagi tig‘iz soatlarda yuklamani boshqarish imkoniyati yaratilib, iste’molchilarga elektr energiyasini oldindan to‘lov asosida yetkazib berish orqali qarzdorlik hosil bo‘lishining oldi olinadi. Aylanma mablag‘lar tanqisligi sabab modernizasiya va rekonstruksiya qilinmayotgan tarmoqlarga ko‘proq mablag‘ ajratish hisobiga elektr energiyasini uzatishdagi uzilishlar soni sezilarli darajada qisqarishiga erishiladi. Asosiysi, dastur orqali qaysi tarmoq yoki hududlarda me’yordan ortiq yo‘qotishlar bo‘layotganini aniqlash orqali elektr energiyasini uzatishda tijorat yo‘qotishlarga imkon qadar to‘siq qo‘yiladi.
Bugungi kunda energiya tejamkorligini oshirish, ekologik toza, noan’anaviy va qayta tiklanuvchan energiya manbalaridan foydalanish ko‘lamini yanada kengaytirish tobora dolzarb ahamiyat kasb etmoqda. Chunki qayta tiklanuvchi energiya manbalaridan unumli foydalanish yer osti boyliklari zaxiralarini tejash barobarida ekologiyaga chiqarilayotgan zararli gazlarning miqdorini kamaytirish imkonini beradi.
Shu bois so‘nggi yillarda respublikamizning sanoat tarmoqlariga “yashil iqtisodiyot” tizimini joriy qilish, ijtimoiy sohada energiya samaradorligini oshirish va qayta tiklanuvchi energiya manbalaridan foydalanishni kengaytirish, innovasion taraqqiyotni jadallashtirish, tabiiy resurslardan oqilona foydalanish bo‘yicha keng ko‘lamli ishlar amalga oshirildi.
Bugungi o‘tkazilayotgan respublika konferensiyasi energetika sohasida tarmoq korxona bilan o‘tkazilayotgan birinchi konferensiya hisoblanib, ishlab chiqarish korxonasi va oliy ta’lim o‘rtasidagi hamkorlikning yorqin ifodasi bo‘lib hisoblanadi. Zero, Prezidentimiz Muhtaram Shavkat Mirziyoyev o‘zlarining nutqlarida ko‘p bor oliy ta’lim va ishlab chiqarish o‘rtasidagi aloqalar rivojlanmas ekan, kadrlar tayyorlash masalasida oldimizga qo‘yilgan maqsadlarning amalga oshishi imkonsiz ekanligini ta’kidlab keladilar.
Anjuman yakunida “Hududiy elektr tarmoqlari” AJ hamda O‘zbekiston Respublikasi Innovasion rivojlanish vazirligi o‘rtasida Past kuchlanishli elektr tarmoqlaridagi texnik yo‘qotishlarni kamaytirishga qaratilgan pilot loyihasini amalga oshirish hamda hududiy elektr tarmoqlari tizimida innovasion ekotizimni shakllantirish bo‘yicha Hamkorlik memorandumi imzolandi.
Shuningdek, “Hududiy elektr tarmoqlari” AJ va Toshkent davlat texnika universiteti o‘rtasidagi hamkorlik Memorandumi” hamda “2021-2025 yillarda Islom Karimov nomidagi Toshkent davlat texnika universitetida “Elektr ta’minoti” sohasi uchun yuqori malakali kadrlar tayyorlash tizimini tubdan takomillashtirish bo‘yicha “Yo‘l xaritasi” imzolandi.
Konferensiya davomida mamlakatimizda bu borada olib borilayotgan ishlar xususida ham fikrlar almashildi.
“Hududiy elektr tarmoqlari” AJ Matbuot xizmati
734
