“Hududgaz Samarqand” gaz ta’minoti filiali tomonidan mavjud energiya resurslaridan oqilona foydalanish va yo‘qotishlarni kamaytirish maqsadida, har bir hududda aholi orasida tegishli targ‘ibot hamda tushuntirish ishlari amalga oshirib kelinmoqda.
Shuningdek, Filialning yuridik shaxslarga tabiiy gaz yetkazib berishni nazorat qilish bo‘limi, Moddiy resurslardan oqilona foydalanish va korrupsiyaga qarshi siyosatni amalga oshirish bo‘limi hamda “Hududgaz Metrologiya” viloyat bo‘limlari hamkorlikda yakka tartibdagi xo‘jalik yurituvchi sub’ektlar tomonidan gaz o‘g‘irliklarini aniqlash bo‘yicha doimiy nazorat tadbirlari o‘tkazilmoqda.
Tahlillarga ko‘ra, 2021 yilning avgust oyida turli xildagi mahsulot ishlab chiqaruvchi “tadbirkor”lar tomonidan shartnoma shartlariga amal qilmay, gaz tarmoqlariga noqonuniy ulanish bo‘yicha jami 12 ta holat aniqlanib, tarmoqdan uzildi. Barcha to‘plangan materiallar esa huquqni muhofaza qilish organlariga topshirildi. Noqonuniy ulanishlar natijasida gaz ta’minoti korxonalariga yetkazilgan zarar miqdori 2 825 687 120,0 (ikki milliard sakkiz yuz yigirma besh million olti yuz sakson yetti ming bir yuz yigirma ) so‘mni tashkil etmoqda.
Ma’lumot uchun: Ushbu hajmdagi tabiiy gaz taxminan 24 mingta xonadonning 6 oylik gaz iste’molini tashkil qiladi.
1437
