2030 yilga borib O‘zbekiston bugungidan ko‘ra 2 barobar ko‘proq elektr energiyasi ishlab chiqarishi zarur. Shu tarzdagina iqtisodiyot va aholi ehtiyojlarini qanoatlantirish, boshqacha aytganda, mamlakat energiya xavfsizligini taʼminlash mumkin. Mazkur maqsadga erishish uchun esa O‘zbekiston Respublikasi Energetika vazirligi tomonidan keng ko‘lamli loyihalar bosqichma-bosqich amalga oshirilib, sohani bozor munosabatlariga o‘tkazish uchun isloh etish jarayonlari muvofiqlashtirilmoqda.

Energetika sohasini isloh etish

Bugungi kunda energetika sohasi istalgan mamlakat taraqqiyotining tagzaminidir. Iqtisodiyotni rivojlantirish, aholining qulay hayot kechirishi, taʼlim, tibbiy xizmat, ijtimoiy taʼminot, kommunal xo‘jalikning moʻtadil faoliyati uchun imkoniyatlar aynan shu sohada yaratiladi. Ammo bugun sohani bozor iqtisodiyoti yo‘liga o‘tkazmay turib, ulkan energetika infratuzilmasini ishchan holatda saqlab turish, boz ustiga, elektr energiyasi ishlab chiqarish hajmlarini oshirish mushkul. Faqatgina elektr stansiyalar, elektr tarmoqlari va energetika infratuzilmasining o‘zga muqobillarini qurish va ishlatish borasida eng zamonaviy yutuqlarni qo‘llabgina qo‘yilgan maqsadlarga erishish mumkin. Bozor qonunlari asosida energetikani rivojlantirish raqobat uchun shart-sharoit yaratadi, bu esa nafaqat vositalar, balki zamonaviy tajriba va texnologiyalar sohibi bo‘lmish eng malakali muhandislarni loyihalarni amalga oshirishga jalb etishga imkon beradi. Shu asnoda yana o‘n yillarcha dolzarb ahamiyat kasb etuvchi uskuna va uslubiyatlarni O‘zbekiston energetikasiga olib kirish mumkin.

Energetika vazirligi 2 yildan oshiqroq vaqt muqaddam tashkil qilingan edi. O‘sha vaqtda OAVda ham, turli uchrashuvlaru majlislarda ham shu to‘g‘rida so‘z borar edi. Yangilanishlarning bosh sababi – ilgarigi tuzilmalarning moslashmaganligi va besamarligidir. Ulardan baʼzi birlari yonilg‘i-energetika majmuasini rivojlantirishga muvofiqlashgan yondashuv; innovatsion boshqaruv tamoyillarini joriy etish; mamlakatimizda sog‘lom raqobat muhitini va qulay investitsiya iqlimini yaratish singari zamonaviy vazifalarga javob bermasdi. Hozir Energetika vazirligi O‘zbekistonning butun yonilg‘i-energetika majmuasi rivojlanishini muvofiqlashtirmoqda. Vazirlik o‘z tarkibidagi tashkilotlar bilan birgalikda elektr va issiqlik energiyasini, ko‘mir ishlab chiqarish, yetkazib berish, taqsimlash va isteʼmol qilish, shuningdek, neft, gazni qazib olish, qayta ishlash va ulardan olingan mahsulotlarni tashish, taqsimlash, sotish va ishlatish jarayonlarini davlat tomonidan boshqarishni amalga oshirmoqda.

Yonilg‘i-energetika majmuasidagi ushbu o‘zgarishlar butun asosiy tuzilmani tubdan isloh etishni talab qildi. Xususan, energetika sohasida 2019 yil boshida “O‘zbekenergo” AJ tubdan qayta tashkil qilinib, uning negizida uchta: “Issiqlik elektr stansiyalari”, “O‘zbekiston milliy elektr tarmoqlari” hamda “Hududiy elektr tarmoqlari” aksiyadorlik jamiyatlari yaratildi. Bunday qayta tashkil qilishdan maqsad – elektr energiyasini ishlab chiqarish, uzatish, taqsimlash va sotishning zamonaviy usullariga o‘tishdir.

Shu tariqa neft-gaz sohasini isloh etish jarayoni boshlanib, buning natijasida bir shakldan boshqa shaklga o‘tkazish bosqichi yakunlandi – “O‘zbekneftgaz” AJ yangi tashkiliy tuzilmasi yaratildi, jamiyat boshqaruv tizimida ortiqcha oraliq bo‘g‘inlar qisqartirildi. “O‘zbekneftgaz” AJ tarkibidan “O‘ztransgaz” AJ chiqarilib, u gaz qazib oluvchi tashkilotlardan kelgusida tashish, shu jumladan, eksport va importni amalga oshirish hamda magistral gaz quvurlariga ulangan isteʼmolchilarga sotish uchun tabiiy gazni xarid qilish bo‘yicha yagona operator etib tayinlandi.

“O‘ztransgaz” AJ gaz taʼminoti hududiy bo‘limlari negizida gaz taqsimlash tarmoqlarini ishlatish, aholiga va ijtimoiy soha obyektlariga tabiiy va suyultirilgan gaz yetkazib berish bilan shug‘ullanuvchi “Hududgaztaʼminot” AJ tashkil qilindi.

Bundan tashqari ilgari respublika Vazirlar Mahkamasi tizimidan o‘rin olgan baʼzi davlat boshqaruvi organlari Energetika vazirligi tarkibiga o‘tkazildi: “O‘zatom” atom energetikasini rivojlantirish agentligi; Neft mahsulotlari va gazdan foydalanishni nazorat qilish inspeksiyasi (muqaddam – Neft mahsulotlari va gazdan foydalanishni nazorat qilish davlat inspeksiyasi) hamda Elektr energetikada nazorat inspeksiyasi (muqaddam – Elektr energetikada nazorat bo‘yicha davlat inspeksiyasi) shular jumlasidandir.

Energetika vazirligi tashkil qilingan kundan buyon o‘tgan davrda qator tub o‘zgarishlar kuzatildi. Qayta tiklanuvchi energiya manbalari (QTEM) asosida energiya ishlab chiqarishni rivojlantirishga ustuvor ahamiyat berildi. 2019 yil may oyida O‘zbekiston Respublikasining “Qayta tiklanuvchi energiya manbalaridan foydalanish to‘g‘risida”gi qonuni qabul qilingani, shuningdek, Energetika vazirligi tomonidan “O‘zbekiston Respublikasida qayta tiklanuvchi energiya manbalarini rivojlantirishning 2019–2023 yillarga mo‘ljallangan konsepsiyasi” ishlab chiqilgani buning tasdig‘idir.

2020 yil aprel oyi oxirida hukumatimiz tomonidan “2020–2030 yillarda O‘zbekiston Respublikasini elektr energiyasi bilan taʼminlash konsepsiyasi” tasdiqlandi. Ushbu hujjat Energetika vazirligi va aloqador vazirliklar, idoralar hamda xalqaro maslahatchilar bilan hamkorlikda ishlab chiqilgan.

Buning zamiridagi bosh maqsad mamlakatni energiya bilan taʼminlash, yaʼni shunday sharoitlarni yaratishdan iboratki, bunda aholi ham, butun iqtisodiyot ham elektr va yonilg‘i bilan uzluksiz taʼminlanadi. Bu esa energiya ishlab chiqarish quvvatlarini oshirish, elektr tarmoqlarini modernizatsiyalash, isteʼmol hisobi va nazoratini takomillashtirish deganidir. Bu murakkab, lekin amalga oshirsa bo‘ladigan vazifalar sirasiga kiradi.

Davlat-xususiy sheriklik

Energetika sohasida bozor munosabatlariga o‘tish yo‘lida muvaffaqiyatli odimlardan biri – O‘zbekiston uchun tamomila yangi model – davlat-xususiy sheriklik (DXSH) asosida energiya, shu jumladan, QTEM ishlab chiqarish loyihalarini amalga oshirishdir. Bugun ushbu model jamiki qurilayotgan va rejalashtirilgan elektr stansiyalar uchun asosga aylandi. Shunday qilib, yangi elektr stansiyalarni, shu jumladan, issiqlik (IES), quyosh fotoelektr (QFES), shamol (SHES) elektr stansiyalarini ishga tushirish ko‘p jihatdan mamlakat energetika sohasida ro‘y berayotgan bozor o‘zgarishlariga misol bo‘la oladi.

DXSH asosidagi loyihalar tender, yaʼni raqobatdosh bozor asosida o‘tkaziladi. Bu jihatdan Jahon banki guruhiga kiruvchi Xalqaro moliya korporatsiyasi, Osiyo taraqqiyot banki, Yevropa tiklanish va taraqqiyot banki eng yaxshi xalqaro tajribani o‘zlashtirish va tenderlar o‘tkazish uchun texnik yordam ko‘rsatmoqda.

Taʼkidlab o‘tish joizki, tender g‘olibi yangi elektr stansiyani loyihalash, qurish va ishlatish uchun masʼuldir. U bilan ishlab chiqariladigan elektr energiyasini xarid qilish yuzasidan 20-25 yilga mo‘ljallangan uzoq muddatli bitim tuziladi. Elektr energiya uchun foydali narx taklifi (tarif) tenderda g‘olib bo‘lish uchun asosiy mezon qilib olinadi. Ammo o‘z taklifini berishdan oldin tender qatnashchilari malakali saralash bosqichidan o‘tishlari lozim. Bunda ular yuksak tajribasini, mablag‘lari mavjudligini, bunday loyihalarni amalga oshirish va taʼminlashga qodirligini isbotlashi lozim. Shunday qilib, O‘zbekiston energetikasida so‘nggi 3 yil davomida jadal joriy qilinayotgan bozor tamoyillari bu sohada sog‘lom raqobat yaratishga imkon beradi, elektr energiya mustaqil ishlab chiqaruvchilarining manfaatdorligi esa buning isbotidir.

Joriy vaziyat

Bugunga kelib elektr energiya xaridi bo‘yicha jami 17 bitim imzolangan, bu esa energetika sohasi uchun raqobat muhitini yaratish borasida muhim bosqichdir. Energiyani mustaqil ishlab chiqaruvchilar qatorida Total Eren SA (Fransiya), Abu Dhabi Future Energy Company – Masdar (BAA), Aksa Enerji Üretim A.Ş. (Turkiya), ACWA Power (Saudiya Arabistoni) kabi kompaniyalar mavjud.

O‘zbekistonda qulay investitsiya iqlimi yaratilgani sharofati ila hukumat kafolati ostida kreditlar jalb etishga zarurat qolmadi.

O‘zbekiston Respublikasi Prezidentining 2019 yil 27 martdagi “O‘zbekiston Respublikasida elektr energetika tarmog‘ini yana-da rivojlantirish va isloh qilish strategiyasi to‘g‘risida”gi qaroriga muvofiq Energetika vazirligi huzurida Loyiha ofisi tashkil qilingan bo‘lib, u xalqaro moliya tashkilotlari bilan ham ish yuritadi. Turli mamlakatlarning energetika sohalarini isloh qilish asnosida katta tajriba to‘plagan xalqaro ekspertlar jalb etilgan.

Ekspertlar tomonidan elektr energiyasining ulgurji raqobatdosh bozoriga izchil o‘tish nazarda tutilgan konsepsiya ishlab chiqilgan. Bunda uch bosqich 2021–2025 yillar davrida bosib o‘tiladi. Birinchi bosqichda elektr energiya korxonalarini erkinlashtirish va ishlab chiqariladigan elektr energiyasini sotishni ixtiyor etgan xususiy (mustaqil) ishlab chiqaruvchilar tomonidan litsenziyalar olish ko‘zda tutilgan. Ikkinchi bosqich davomida elektr energiyasini taqsimlash tizimining yagona operatori yaratiladi, elektr energiyani isteʼmolchilarga sotishga oid vazifalar esa asta-sekin yetkazib beruvchilarga o‘tkaziladi. Isteʼmolchilar elektr energiyani savdo onlayn-platformasi yoxud istalgan yetkazib beruvchi orqali xarid qilish imkoniyatini qo‘lga kiritadi. Uchinchi bosqich – “Kun ichi (soatbay) savdolar”. Unga binoan, rejali asosda savdo maydonchasida soatbay ishlab chiqarilgan va isteʼmol qilingan elektr energiyaning ortiqcha yoki tanqis hajmlarining onlayn oldi-sotdisi amalga oshiriladi.

Soha meʼyoriy-huquqiy negizini takomillashtirishga doir ishlar davom ettiriladi. Xususan, quyidagi loyihalar: O‘zbekiston Respublikasining “Elektr energetikasi to‘g‘risida”gi qonuni (bu borada Yevropa tiklanish va taraqqiyot banki hamda Jahon banki ekspertlari bilan hamkorlikda ishlar olib borildi), O‘zbekiston Respublikasi Prezidentining “Elektr energetikasi sohasini isloh qilishning qo‘shimcha chora-tadbirlari to‘g‘risida”gi qarori, O‘zbekiston Respublikasi Vazirlar Mahkamasining “Magistral elektr tarmoqlari kodeksini tasdiqlash to‘g‘risida”gi qarori ekspertizasi bo‘yicha ishlar faol kechmoqda.

Energiya samaradorligi

Ijtimoiy-iqtisodiy sohalarda energiya samaradorligini oshirish masalasi bugun hukumatning diqqat markazida. Ekspertlar bergan maʼlumotlarga ko‘ra milliy iqtisodiyot energiya sig‘imdorligi rivojlangan mamlakatlar ko‘rsatkichlaridan 2-2,5 baravar yuqori.

Agar jahonda energiya isteʼmolining qariyb 23 foizi uy-joy sohasiga to‘g‘ri kelsa, O‘zbekistonda bu raqam 40 foizni tashkil qilmoqda. Xususan, Yevropada 1 kvadrat metr uchun energiya sarfi yiliga 120-150 kilovatt-soatni tashkil qilsa, O‘zbekistonda bu ko‘rsatkich 390 kilovatt-soatdan oshmoqda.

Energiya samaradorligini oshirishga doir ishlarni olib borish jarayonida 2020 yilda iqtisodiyot tarmoqlarida tashkiliy-texnik tadbirlarni amalga oshirish evaziga 1352,4 mln. kub metr tabiiy gaz, 917,5 mln. kilovatt-soat elektr energiyasi tejashga erishildi.

Energiya ishlab chiqarish

Energetika sohasida qanday islohotlar ro‘y bermasin, natija, yaʼni O‘zbekiston aholisi va iqtisodiyotini energiya zaxiralari bilan barqaror taʼminlash muhim. Salkam 10 yildan keyin elektr energiyaga ehtiyojning ikki karra o‘sishi haqida darak beruvchi tahliliy bashoratlarni inobatga olsak, Energetika vazirligi va yoqilg‘i-energetika majmuasining asosiy vazifalaridan biri – yangi elektr stansiyalar, shu jumladan, IES qurish, QTEM ni rivojlantirish, QTEM asosida boshqa yangi loyihalarni izlash va amalga oshirish, GES, shu hisobda kichik GES imkoniyatlarini yana-da kengaytirishdan iborat.

Energiya ishlab chiqarishni oshirish borasida bugun qanday natijalarga erishdik?

2021 yil oxiriga borib, energiya ishlab chiqarish quvvatlarini 14 mingdan 15,8 ming MVt ga oshirish yoxud qo‘shimcha 1,8 ming megavatt quvvatlarni ishga tushirish rejalashtirilgan. Natijada 2016 yilga nisbatan ishlab chiqarish quvvatlari 50 foiz ortadi. DXSH asosida Toshkent viloyatida uchta (umumiy quvvati 710 MVt), Buxoro va Xorazm viloyatlarida ikkita (umumiy quvvati 444 MVt) IESlar hamda Navoiy va Samarqand viloyatlarida ikkita (umumiy quvvati 200 MVt) FESlar ishga tushiriladi.

Yangi zamonaviy IESlarni ishga tushirish orqali yiliga qariyb 1,5 mlrd. kub metr tabiiy gaz tejalib, aholi ehtiyojlari uchun elektr energiyani qo‘shimcha ishlab chiqarish imkoniyati yaratiladi.

2025 yilga borib energiya tizimi quvvatini 25,6 GVt ga yetkazish kutilmoqda, ular orasida: issiqlik elektr stansiyalari 18,8 GVt, gidroelektr stansiyalar – 2,5 GVt ni taʼminlab, quyosh va shamol elektr stansiyalari quvvati esa 4,3 GVt ga yetadi. Jismonan eskirgan qurilmalar bora-bora foydalanishdan chiqariladi.

2030 yilga borib umumiy ishlab chiqarish quvvati 29 200 MVt ni tashkil etadi, bu esa bugungi ko‘rsatkichlarga qaraganda 2 barobar ko‘proqdir. Natijada 2030 yilda elektr energiya ishlab chiqarish hajmi 120,1 mlrd. kilovatt-soatni tashkil etadi (2020 yilda ushbu ko‘rsatkich 66,4 mlrd. kilovatt-soat edi).

 

Modernizatsiya

Bugun qanchalik ko‘p elektr stansiyalar qurilmasin, amaldagi IES va GESlarni to‘liq modernizatsiyalash – energiya samaradorligi sohasidagi eng so‘nggi yutuqlar asosida uskuna va texnologiyalarni joriy qilish muhim vazifa bo‘lib qolaveradi. Butun mamlakat bo‘ylab amaldagi IESlarda yetakchi xorijiy kompaniyalar ishlab chiqargan bug‘-gaz qurilmalari o‘rnatilayotgani bunga yaqqol misol. Har bir shunday modernizatsiya zamirida yuzlab milliy va xorijiy mutaxassislar mehnati mujassam. Ularning kasbiy mahoratisiz aniq hisob-kitoblar keltirilgan va jamiki mavjud shart-sharoitlar nazarda tutilgan loyihalarni, xususan, maʼlum bir IESni ishlatish vaqtiyu quvvatidan tortib ham standart, ham o‘ziga xos jihatlargacha inobatga olingan loyihalarni amalga oshirish amrimahol. Elektr stansiyadek murakkab texnik inshoot bilan boshqacha bo‘lishi ham mumkin emas.

 

Bugunga kelib amaldagi IESlarni hamda elektr uzatish milliy tizimini modernizatsiyalash bo‘yicha qanday ishlar bajarilgan?

Bu xususda raqamlar asl vaziyatdan yaqqol darak beradi. Agar 2000 yilda O‘zbekiston energetika tizimining ishlab chiqarish quvvati 7 750 MVt ni, 2016 yilda esa – 10 830 MVt ni tashkil etgan bo‘lsa, ushbu vaqt ko‘rsatkichlari oralig‘ida o‘tgan 16 yil ichida qariyb 3 ming MVt ishga tushirildi. Bugunga kelib energetika tizimida mavjud ishlab chiqarish quvvatlari 14 131 MVt ni tashkil qilmoqda. Yaʼni keyingi 3 ming megavattdan ziyod quvvatlar so‘nggi uch yil mobaynida ishga tushirilgan.

2017–2021 yillarda ishlab chiqarish quvvatlarining bunday keskin o‘sishiga asosan Navoiy, Tolimarjon, Toshkent issiqlik elektr stansiyalarida yangi bug‘-gaz qurilmalarini (BGQ) ishga tushirish evaziga erishildi. Shuning barobarida 2019 yilda 900 MVt quvvatli yangi To‘raqo‘rg‘on IES ishga tushirildi. Zamonaviy tejamkor uskuna va texnologiyalarni joriy etish hisobiga IESlarda shartli yonilg‘i sarfi 2016 yildagi 375,8 g/kilovatt-soatdan 2020 yilda 333,9 g/kilovatt-soatgacha yoki 11 foiz kamaydi (– 41,9 g/kilovatt-soat).

Bundan tashqari Sirdaryo IES modernizatsiya qilinmoqda, bu esa uning quvvatini 150 MVtga oshirishni taʼminlaydi. Farhod GES ham modernizatsiya jarayonida, bu ishlar natijasida uning quvvatiga yana 13 MVt qo‘shiladi.

Mazkur yo‘nalishdagi ishlar natijasi o‘laroq, 2025 yilga borib mamlakat energetika tizimining quvvatini 25 600 MVt ga, 2030 yilda esa 29 200 MVt ga yetkazish vazifasi amalga oshirilmoqda.

Energiya ishlab chiqarishni oshirish bilan bir qatorda elektr energetikaning yetkazib berish infratuzilmasini modernizatsiyalash va yangilash zarur. Ushbu ikki yo‘nalishni birlashtiribgina, mamlakat energiya xavfsizligini taʼminlash bo‘yicha muhim vazifani uddalash mumkin. So‘nggi yillarda elektr uzatish tarmoqlarini mustahkamlash borasida ham talaygina ishlar olib borilmoqda.

Past kuchlanishli elektr uzatish tarmoqlari so‘nggi 4 yilda modernizatsiya qilinib, 25 ming kilometr uzunlikda o‘tkazilib yangidan tortildi. Taʼkidlash kerakki, 1991–2016 yillarda 9 300 km past kuchlanishli elektr uzatish tarmoqlari modernizatsiyalangan va qurib bitkazilgan edi, bu esa qariyb 2,7 barobar kam. So‘nggi yillarda 9 575 ta transformator punkti modernizatsiya qilindi va yangilandi, bu esa jami transformator punktlarining 60 foizini tashkil qiladi. Shu yilning o‘zidayoq o‘tgan yilga nisbatan 13 foiz yoxud 26 300 km ko‘proq past kuchlanishli elektr uzatish tarmoqlari hamda 16 foiz ko‘proq yoxud 9 000 dan ziyod transformator podstansiyalari taʼmirlanadi.

2021–2030 yillarda 0,4–110 kV kuchlanishli tarmoqlarni rekonstruksiya va modernizatsiya qilish bo‘yicha belgilangan ishlar jadal davom ettirilmoqda. Unga ko‘ra 130 ming km elektr uzatish tarmoqlari va 40 mingdan ortiq transformator punktlari bosqichma-bosqich modernizatsiya qilinadi hamda yangilanadi.

 

Qayta tiklanuvchi energiya manbalari

O‘zbekiston – serquyosh o‘lka, bu esa quyosh fotoelektr stansiyalari kabi QTEM asosida energiya ishlab chiqarish bo‘yicha muhim yo‘nalishni rivojlantirishda muhim omildir.

Energetika vazirligi Osiyo taraqqiyot banki va Jahon banki bilan hamkorlikda O‘zbekistonda elektr taʼminotining o‘n yillik rejasini ishlab chiqqan. 2030 yilga borib bu rejaning bajarilishi qo‘shimcha energetika quvvatlari yaratilishiga olib kelib, ular 5 GVt quyosh energiyasi, 1,9 GVt gidroenergiya va 3 GVt gacha shamol energiyasini o‘z ichiga oladi.

Davlatimiz tomonidan 2030 yilga borib, elektr energiyani ishlab chiqarishning umumiy hajmida QTEM ulushini 25 foizga oshirish maqsadi qo‘yildi. Bugun ushbu ko‘rsatkich 10 foizni tashkil etmoqda.

Joriy yil kuzida mamlakatda birinchi sanoat xususiyatiga ega 100 MVt quvvatli FESni foydalanishga topshirildi. U Navoiy viloyatining Karmana tumanida “Masdar” kompaniyasi (BAA) tomonidan qurildi. Shu bilan birga yaqin oylarda Samarqand viloyatida 100 MVt quvvatli FESni ishga tushirish rejalashtirilgan. Mazkur loyiha investori – “Total Eren” kompaniyasi (Fransiya).

Aytib o‘tish kerakki, QTEM loyihalarini amalga oshirish borasida Scaling Solar dasturi muhim o‘rin egallaydi. Ushbu dastur doirasida 2020 yilda Samarqand va Jizzax viloyatlarida har biri kamida 200 MVt quvvatli ikkita FESni qurish uchun tender eʼlon qilingan edi. Tenderda qatnashish uchun 83 kompaniya buyurtmanoma topshirdi, bu esa investorlarning O‘zbekistonda QTEM sohasida loyihalarni amalga oshirishga qiziqishi ancha kuchayganidan dalolat beradi. Joriy yil boshida tenderning ikkinchi bosqichi o‘tkazilib, may oyida tender komissiyasi “Masdar” kompaniyasini g‘olib, deb topdi.

Birlashgan Arab Amirliklari kompaniyasining kuchli jihatlaridan biri – elektr energiyasini yetkazib berish bo‘yicha taklif kiritishidir. Yaʼni ushbu FESlarda 25 yil davomida rekord darajadagi past tariflar bo‘yicha energiya yetkazib berish rejalashtirilgan. Xususan, Jizzax FES elektr energiyasi yagona energetika tarmog‘iga bir kilovatt-soat uchun 1,823 AQSH senti tarifi bo‘yicha, Samarqand FES esa – 1,791 AQSH senti tarifi bo‘yicha yetkazib beriladi.

Bunday misollarni ko‘plab keltirish mumkin. Xususan, shamol elektr stansiyalarini joriy qilish borasida ham alohida ishlar olib borilmoqda. Ular ham yaqin kelajakda mamlakatning umumiy tarmog‘iga elektr energiya yetkazib berishni boshlaydi. “Masdar” kompaniyasi ishtirokida Navoiy viloyatining Tomdi tumanida umumiy quvvati 500 MVt li shamol elektr stansiyasini qurish bo‘yicha loyiha amalga oshirilmoqda. SHES quvvatlarining birinchi navbatini 2024 yilda ishga tushirish mo‘ljallangan.

Qoraqalpog‘iston Respublikasida shamol elektr stansiyasi (SHES) qurilishi bo‘yicha dastlabki tenderlar haqida alohida taʼkidlash joiz.

O‘zbekistonda qayta tiklanuvchi energiya manbalariga asoslangan yangi quvvati 100 MVt bo‘lgan shamol elektr stansiyasi loyiha bitimlari imzolangan kundan boshlab 2 yil ichida ishga tushiriladi.

Olingan takliflarni baholash natijalariga ko‘ra, "ACWA Power" kompaniyasi tomonidan SHES qurilishi bo‘yicha tender g‘olibi deb topildi va u bir kilovatt-soat elektr yenergiyasi uchun 2,5695 AQSH sentlik tarif taklif qildi.

Boshqa bir yirik kompaniya – “ACWA Power” (Saudiya Arabistoni) bilan Buxoro viloyatining G‘ijduvon va Peshku tumanlarida har birining quvvati 500 MVt dan bo‘lgan 2 ta shamol elektr stansiyasini qurish loyihasiga oid bitimlar imzolangan. To‘g‘ridan-to‘g‘ri investitsiyalar 1,3 mlrd. AQSH dollaridan iborat. Shamol elektr stansiyalarini 2023 yilda foydalanishga topshirish mo‘ljallangan.

O‘zbekistonda qayta tiklanuvchi energetika bo‘yicha joriy qilinayotgan loyihalar mamlakat energetika sohasi oldida qo‘yilgan vazifalarni amalga oshirishga o‘z hissasini qo‘shadi. Shuningdek, bu issiqxona gazlarining yillik chiqaruvini CO2 ekvivalentida taxminan 500 ming tonnaga kamaytirishga yordam beradi.

Shunday qilib, raqamlar va dalillarga tayanib aytish mumkinki, so‘nggi bir necha yilda O‘zbekiston energetikasini eng yaxshi xalqaro tajriba asosida rivojlantirish, energetika sohasi bozor munosabatlari sharoitida ishlashga o‘tishini taʼminlash borasida muhim ilgarilash ro‘y berdi. Bularning bari o‘sib borayotgan isteʼmol talablariga javob berib, hozirgi va keyingi davrda mamlakat energiya xavfsizligini taʼminlash uchun imkon yaratishi shubhasiz.