Iste’molchilarni elektr energiyasi, tabiiy va suyultirilgan gaz bilan ta’minlash sifatini oshirish maqsadida olib borilayotgan modernizasiya va rekonstruksiya ishlari: 22 sentyabr kuni amalga oshirilgan ishlar — ayrim hududlar misolida.
Toshkent shahar:
Tabiiy gaz nazorati va hisobini yuritishning avtomatlashtirilgan tizimi loyihasini joriy etish doirasida Toshkent shahrida tizimli ishlar amalga oshirilmoqda. Hozirgi kunga qadar aholi xonadonlariga 132 442 ta zamonaviy “aqlli” gaz hisoblagichlari o‘rnatildi.
Buxoro viloyati:
Maishiy gaz ballonlarini uzluksiz va bir maromda yetkazib berish maqsadida filial tasarrufidagi “Romitan”, “Qorako‘l” va “Vobkent” gaz to‘ldirish shoxobchalarida yangilanish jarayonlari olib borilmoqda. Gaz to‘ldirish shoxobchalarining quvvatini oshirish ishlari samarali tashkil etilmoqda. Iste’molchilarni uzluksiz suyultirilgan gaz bilan ta’minlash uchun gaz to‘ldirish shoxobchalarida qo‘shimcha 6 dona gaz quyish uskunalari, 3 dona kompressor va 1 dona nasos o‘rnatilish ishlari amalga oshirildi.
Samarqand viloyati:
“Obod qishloq” va “Obod mahalla” dasturlariga asosan Pastdarg‘om tuman elektr tarmoqlari korxonasi xodimlari “Ilm” MFY hududida 29 dona temir-beton tayanch ustunlarini o‘rnatib, 1 km uzunlikda zamonaviy SIP-2 kabellarini tortdilar. Hududda transformatorlar quvvatini oshirish, eski tarmoqlarni demontaj qilish ishlari amalga oshirilmoqda.
Shuningdek, “Balxiyon” MFY ga 0,4 kV elektr uzatish tarmoqlariga kabel tortish ishlari olib borilmoqda. Hududdagi barcha elektr uzatish tarmoqlari daraxt shoxlaridan tozalanib, ta’mirlanayapti.
Navoiy viloyati:
Qiziltepa tumani “Arabon” MFY hududiga shu kunga qadar 46 dan ortiq yangi temir-beton tayanchlari, quvvati 250 kVA bo‘lgan yangi transformator punkti o‘rnatildi. Bundan tashqari, 2,5 kmga yaqin uzunlikda 0,4-6 kVli yangi elektr uzatish tarmog‘i tortilib ayni vaqtda yakuniy montaj ishlari amalga oshirilmoqda. Bu bilan hududdagi 280 dan ortiq iste’mochilarni elektr ta’minoti yaxshilanadi.
“Obod qishloq” va “Obod mahalla” dasturlari ijrosini ta’minlash maqsadida, Karmana tuman “Varq” MFY hududi ko‘chalarida quvvati 160 kVA bo‘lgan 2 dona transformator punkti olib kelindi va jami 109 dona temir beton tayanchlar o‘rnatilmoqda. Endilikda ushbu MFYda yashovchi 270 dan ortiq aholi xonadonlarining elektr energiyasi yaxshilanishiga erishiladi.
Buxoro viloyati:
Shofirkon tuman elektr ta’minoti korxonasi tomonidan tumanning “Savrak” MFY “Savrak” qishlog‘i aholisi uchun qo‘shimcha ravishda 160 kVA quvvatga ega transformator punkti o‘rnatib berildi.
Hozirda 1 km uzunlikdagi himoyalangan SIP kabellarni tortish uchun 20 dona mustahkam temir-beton tayanchlarni o‘rnatish ishlari olib borilmoqda. Dastur asosida belgilangan ishlar yakuniga yetkach, savrakliklarning elektr energiyasi ta’minoti yanada yaxshilanadi.
Sirdaryo viloyati:
“Obod qishloq” va “Obod mahalla” dasturlariga asosan “Sirdaryo hududiy elektr tarmoqlari”AJ tomonidan Sirdaryo viloyatining barcha tumanlarida elektr tarmoqlari qurilib va rekonstruksiya ishlari olib borilmoqda.
Mirzaobod tuman elektr ta’minoti korxonasi ishchi-xodimlari tomonidan tumanning “Mirzo Ulug‘bek” mahallasida aholi xonadonlarini sifatli elektr energiya bilan ta’minlash maqsadida zamonaviy SIP kabel tortish ishlari bajarilmokda.
Viloyatning Mirzaobod tumanida elektr ta’minotini yaxshilash bo‘yicha ko‘lamli ishlar amalga oshirildi. Tarmoqlardagi yo‘qotishlarni oldini olish maqsadida 41 km uzunlikdagi havo tarmoqlari tortilib, 17 dona yangi zamonaviy transformator punktlari qurildi.
Xorazm viloyati:
“Obod qishloq” va “Obod mahalla” dasturlari ijrosini ta’minlash maqsadida “Hududiy elektr tarmoqlari” AJ tomonidan navbatdagi transformatorlar “Xorazm hududiy elektr tarmoqlari”AJga o‘z vaqtida yetkazib berilmoqda.
467
