O‘zbekiston Energetika vazirligida Energetika Xartiyasi kotibiyatining Bosh kotibi Urban Rusnak boshchiligidagi delegatsiya bilan uchrashuv bo‘lib o‘tdi.
Energetika Xartiyasi kotibiyati mutaxassislari bilan bo‘lib o‘tgan uchrashuvda “O‘zbekiston Respublikasining energiya samaradorligi sohasidagi siyosatini chuqur ko‘rib chiqish” loyihasi, jumladan, qonunchilikni keng ko‘rib chiqish va bu sohada amalga oshirilayotgan islohotlarning borishi muhokama qilindi.
Unda shuningdek, O‘zbekiston energetika bozorining tuzilishi, mamlakatdagi energiyaga bo‘lgan talab va taklif, energiya resurslari narx siyosati, suv va energiya resurslari o‘rtasidagi munosabatlar, hozirgi ekologik menejment va hozirgi kunda respublikada amal qilayotgan energetika siyosati va energiya samaradorligi siyosatining boshqa tarkibiy qismlari tahlil qilindi.
Shuningdek, eng yaxshi xalqaro tajribani hisobga olgan holda, Energetika xartiyasi kotibiyati iqtisodiyot va ijtimoiy sohaning yoqilg‘i va elektr energiyasi, qurilish, transport tarmoqlari, sanoat, uy-joy kommunal xo‘jaligi, yoritish va energiya isteʼmol qiluvchi qurilmalar kabi boshqa tarmoqlarda energiya samaradorligi darajasini yana-da oshirish bo‘yicha tavsiyalar tayyorladi.
Tomonlar tayyorlangan loyiha taqrizi, xulosa va tavsiyalarni atroflicha muhokama qildilar.
Shuni qo‘shimcha qilish kerakki, ushbu sharh yoqilg‘i-energetika sohasiga aloqador barcha tashkilotlar bilan ko‘rib chiqilgan va potensial investorlarning elektr energetika sektorining huquqiy asoslarini va mamlakatda amalga oshirilayotgan islohotlarni o‘rganish tartibini sezilarli darajada soddalashtirishga xizmat qiladi.
Uchrashuv davomida Energetika xartiyasi kotibiyati rahbari U.Rusnak eng yaxshi xalqaro tajribalar asosida amalga oshirilayotgan energetika sohasini isloh qilishning muhim surʼatlarini qayd etdi. Shuningdek, O‘zbekistonning isteʼmolchilarni “aqlli hisoblagichlar” bilan taʼminlash va ular asosida respublika isteʼmolchilarini to‘liq qamrab olish imkoniyatini beruvchi elektr energiyasini hisobga olishni avtomatlashtirish markazini yaratishdagi yutuqlarini taʼkidladi.
O‘zbekiston Respublikasi
Energetika vazirligi Matbuot xizmati
1207
